Jess Svane: Ineqarneq akikinnerulissava? Aappi!

Taama isumaqarpoq Inatsisartunut ilaasortaq, Jess Svane, Siumut.

Taassuma piumasaraa Naalakkersuisut piaartumik qanoq iliuuseqarnermikkut inissianut kiassarnermullu akit kommunit peqatigalugit nalilersortariaqaleraat.

- Init akikinnerulersissavaguut? Uanga eqqarsartaatsinni aappi. Tassami inissiani najugaqartut akiliiuaannarlerpata, naallu aningaasat isertinneqartussat ikilisussaagaluartut, aningaasat ullormut kaaviiaartinneqartut amerlisussaapput. Taamaaliornikkullu inissiani najugaqartut akiliijuaannalernissaat anguneqassaaq aamma inissianik aserfallattaaliinermut akissaqalissagaluarpugut.

Aamma atuaruk Narsami 2015-imi anisitaasussat 89-upput

Jess Svanep Naalakkersuisut eqqarsaqquai, ilumut inissianut akit ineqartut aningaasaqarnerannut naapertuuttumik akilersortinneqarnersut.

- Taamaammat suleqatigiissutigineqartariaqalerpoq misilittakkallu assigiinngitsut kommunit Namminersorlutillu Oqartussat maannamut misilittagaat avitseqatigiissutigineqartariaqalerlutik, Jess Svane oqarpoq.

Naalakkersuisut kommunillu eqqartueqatigiittariaqalerput.

Taassuma aamma piumasaraa ineqarnermut inatsisip eqaannerusumik aaqqinneqarnissaa Naalakkersuisut kommuninik suleqateqarnermikkut eqqarsaasersorfigisariaqaleraat.

- Inuit najugaqartariaqarnerannut pisortat tapiisarput. Tamassuma takutiinnarpaa inissianut akit qaffasippallaarujussuartut inuillu taakkunani najugaqartut ilaasa akissarsiaannut akit naapertuutinngilluinnartut. Taassuma saniatigut inissianik attartornermi sumiginnaasarnerup qanoq iluarsineqarnissaa aamma oqartussanit eqqartorneqartariaqarpoq.

Inatsisartunut ilaasortaq, Jess Svane, Siumut taama oqarpoq.

Nunarput tamaat eqqarsaatigalugu, inissiani najugaqartut 400-it missaanniittut, ukioq manna anisitaanissartik naatsorsuutigisinnaavaat.