Narsami 2015-imi anisitaasussat 89-upput
Inissiani ineqartut anisitaasartut amerligaluttuinnartullu ikilisinneqassappata inuiaqatigiit akornanni oqallittoqartariaqarpoq, taama isumaqarpoq, Kujataani Narsami najugalik kommunalbestyrelsemullu ilaasortaq.
Inissiaatileqatigiiffik A/S INI-mi attartortut akiliisinnaanngitsullu ukioq manna anisitaasussat 400-it missaanniittut, Partii Naleraq sinnerlugu Inatsisartunut ilaasortap, Anthon Frederiksenip paragraf 37 naapertorlugu apeqquteqareernerani, Naalakkersuisut akissutaanni erserpoq. Narsami attartortut 89-it ukioq manna anisitaasussaasut aamma akissummi erserluni.
Ajornartorsiut tamanna annertooq qaangerneqassappat, Kujataani suliffissanik pilersitsiortornissaq pisariaqarpoq aamma Oqartussat, kommunit innuttaasullu ataatsimoorussaannik paasititsiniaanerit pisariaqalerput anisitaasartut siunissami ikilisinneqassappata, Kommuni Kujallermi kommunalbestyrelsemut ilaasortaq, Josef Petersen, Atassut taama isumaqarpoq.
Narsami inuuniarneq ajornarnerulersimavoq.
- Narsami innuttaasut ilaasa inuuniarnikkut atugaat ukiuni kingullerni ajorsiartuinnavissimapput. Suliffissaaleqineq annertoorujussuarmik pilersimavoq. Tamakkulu kinguneraat inuit ajornartorsiuteqalerneri. Tamakkulu tamarmik kinguneraat inissianik attartortut amerligaluttuinnartut akiliisinnaajunnaartarnerinut.
Atassut sinnerlugu kommunalbestyrelsemut ilaasortaq, Josef Petersen taama oqarpoq.
Tamannalu qaangerneqassappat Oqartussat, kommunit innuttaasullu suleqatigiittariaqartut, Josef Petersen isumaqarpoq.
Paasisitsiniaasoqarlunilu oqallittoqartariaqarpoq.
- Taamaattumik Namminersorlutik Oqartussat kommunillu innuttaasut peqatigilluinnarlugit oqallitsitsisariaqrput taamatullu paasisitsiniaasoqarluni, pingaartumik suliffeqarluni akiligassanut akiliisarnissap qanoq pingaaruteqartigineranik. Aamma suliffeqanngikkaanni imminullu pilersorsinnaanngikkaanni, suut periarfissaanersut paasisitsiniutigissallugit pingaaruteqarluni.
Kommuni Kujallermi kommunalbestyrelsemut ilaasortaq, Josef Petersen aamma isumaqarpoq, Akileraartarnermut Atugarissaarnermullu Ataatsimiititaliap 2011-mi siunnersuutaa, tassa Kiffaq-konto atorneqartariaqalersoq, taamaaliornikkut inigisaminnik akiliisinnaanngitsut ikiorserneqarlutik piffissaq eqqorlugu inigisaminnut akiliisalernissaat anguniarneqarluni.
