Erik Jensenip atorfinnik ilinniarfinnillu nuussineq qanoq aningaasalersorneqassanersoq akissutissaqartinngilaa, Nuulli avataani illoqarfiit amerlanerit aningaasaliiffigineqartariaqartut oqarpoq.Assi: KNR / Malik Brøns

Jensen: Suliffeqarfiit ilinniarfiillu uku nuunneqartariaqarput

Siumup siulittaasuata Nuummut eqiterunneq atorfinnik ilinniarfinnillu nuutiterinikkut akiorusuppaa, Demokraatilli sakkortuumik akerliliipput.

Erik Jensen Namminersorlutik Oqartussani atorfiit ilaat sinerissamut nuunneqarnissaat Siumup angorusukkaa oqarpoq.

Atorfinnik nuussineq maanna sukkasuumik pisariaqartoq taanna oqarpoq. Asuliinnarli nuussisoqarani nuuttariallit nuukkusuppai.

- Nunaateqarnermut savaateqarnermut tunngasut kujataaniittariaqarput, sanaartornermut tunngassuteqarpat kommunit aningaasaliissutit tingusariaqarpaat, kommunimmi nalunnginerummassuk sumi sunillu pisariaqartitsineq annertunerpaajunersoq, Erik Jensen KNR-imut oqarpoq.

D: Suliffiit nutaat Nuup avataaniissapput

Tamanna qanittumut allaat naalakkersuisoqataannit Demokraatinit isumaqatigineqanngeqaaq. Taakkua KANUKOKA-p Maniitsumut nuunneqaraluarnera assersuutigaat. Kattuffimmimi tassani atorfillit Maniitsumut nooqataajumanngillat.

- Taamaattumik pitsaanermik eqqarsartariaqarpugut. Suliffiit Nuummi pioreersut nuunnagit, suliffeqarfiilli pisortanit pigineqartut nutaat Nuup avataanut inissillugit, Jens Frederik Nielsen KNR-imut oqarpoq.

Suliffeqarfinnik Nuummiit illoqarfinnut allanut nuussiinnarneq inuiaqatigiinnut akisuallaassasoq, taanna isumaqarpoq.

Taassuma nalunaarusiaq 2016-imi saqqummertoq "Naligiimmik siunissaqarneq" innersuussutigaa. Tassuma kingorna kukkunersiuisut BDO misissuipput suliffinnillu nuussineq inuiaqatigiit ukiuni sisamani minnerpaamik 500 millionit koruuninik akileeqataaffigissagaat inerniliuunneqarpoq.

Ilinniarfiit aamma nuunneqarusuttut

Siumup atorfiit nuunneqarnisssaat kisiat angorusunngilaa, taakkua ilinniarfiit ilaat aamma nuukkusuppaat. Savimminilerinermik ilinniarfiup Nuummiit Sisimiut nuunneqarnissaa, Niuernermik Ilinniarfiup Nuummiit Qaqortumut nunneqarnissaa Siumup aamma angorusuppaa.

Taamaaliornikkut aningaasarsiorneq nunap immikkoortuinut tamanut siaruassasoq Erik Jensen oqarpoq. Ilisimatusarfilli nuunnani Nuummiiginnassasoq taanna erseqqissaavoq.

Ilinniarfinnik nuutsitsineq ilinniartut inaannik illoqarfinni anginerni tallimani sanaartornerup maanna aallartereerneranit qulakkeerneqassasoq taanna aamma oqarpoq.

Erik Jensenip atorfinnik ilinniarfinnillu nuussineq qanoq aningaasalersorneqassanersoq akissutissaqartinngilaa, Nuulli avataani illoqarfiit amerlanerit aningaasaliiffigineqartariaqartut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat