Jensenip aalisarnermut inatsit oqallisaaqisoq naammassisussaassagaa
Erik Jensenip maanna naatsorsuuutigaa, teknikkimut tunngasortaanik annikitsunik allannguisoqarumaartoq. Kisiannili annertunerusumik allannguisoqassappat allannguisussat tassaasut inatsisartut.
AAMMA ATUARUK Naalakkersuisunngortut qaammatini pingasuni tusagassiortunit eqqissisimatinneqassapput
- Inatsisartunngorumaartussat ataatsimiititaliatut taanna aalajangertussaassavaat. Kiisalu aamma kattuffiit suleqataasussat assigiinngitsut, taakkua oqaloqatigeqqaarnissaat pingaaruteqarpoq, taakku qanoq oqariartuuteqarpat? Taakkua paaseqqaalaarlugit pitsaanerussaaq, qanoq allatut aaqqiisoqarsinnaanersoq, Aalisarnermut Naalakkersuisunngortussaq Erik Jensen oqarpoq, taassumalu aalajangiusimallugu oqaatigaa, naalakkersuisoqatigiinnissamut isumaqatigiissummi allassimammat, aalisagartassiissutit pitsaanerusumik agguaanneqartassammata.
Taamaattumillu naatsorsuutigalugu raajartassat agguaaneqartarnerat, tassalu avataasiorluni sinerissallu qanittuani raajartassat naligiimmik aalisagartassiissutigineqartassammata, 50 procent avataasiortunut raajartassiissutigineqartalissallutik 50 procentillu sinerissap qanittuani aalisartunut raajartassiissutigineqartalissallutik.
Raajartassiissutit avataasiortunut sinerissallu qanittuani aalisartunut pisassiissutigineqartut angeqqatigiimmik avinneqartarnissaat Inatsisartunut qineqqusaartoqarnerani Siumumit aalajangiusimaneqarpoq tamassumalu ingerlateqqinneqarnissaa pillugu kattuffiit, innuttaasut, aalisarnermullu attuumassuteqartut oqaloqatigineqassasut Alisarnermut Naalakkersuisunngortussaq Erik Jensenip ilanngullugu oqaatigaa.
AAMMA ATUARUK Kim Kielsen isumalluarpoq
Inatsit taarsiivigineqarnissamik piumasaqaateqartitsisinnaasoq
Aalisarnermut inatsisissatut siunnersuummi pingaarnerit ilagaat, raajarniarnermi pisassiissutinik nammineq pigisanik piginnittuunermik naatsorsuineq nutaaq eqqunneqarnissaa, Kalaallit Nunaanni raajanik pisassiissutit agguarnerisa 43/57 procentimit sinerissap qanittuani raajarniarnermut 50 procentinngorlugit aamma avataasiorluni raajarniarnermut 50 procentinngorlugit allanngortinneqarnissaat, raajarniarsinnaanermullu akuersissutinik piffissamut killiligaanngitsunik atorunnaarsitsineq sivikinnerpaamik ukiunut tallimanut siumut nalunaaruteqarluni Inatsisartut inatsisaatigut pisinnaalersinneqarnissaa.
Aalisarnermut inatsisissatut siunnersuut Inatsisartut ukiakkut ataatsimiinneranni siullermeerneqarpoq. Siunnersuut taamani oqallisaasorujussuuvoq, kilisaatileqatigiiffiimmi annerit inatsit akuersissutigineqassappat Namminersorlutik Oqartussanit milliardilinnik taarsiivigineqarnissamik piumasaqaateqarniarlutik sioorasaarutigimmassuk.
AAMMA ATUARUK Broberg angisuunik suliassaqarpoq
AAMMA ATUARUK Aleqa Inatsisartuniililersoq
