Kim Kielsen Naalakkersuisunngortut qaammatini pingasuni tusagassiortunit eqqissisimatinneqassapput
Kim Kielsenip Naalakkersuisunut ilaasortanngortussatut innersuuneqartut tallimanngornermi ilisaritippai
Politikikkut misilittagaqanngitsup Pele Brobergip aningaasaqarnermut naalakkersuisunngornissaa Siumup siulittaasuata Kim Kielsenip naalakkersuisunullu siulittaasussatut innersuuneqartup ajornartorsiutissartaqartinngilaa.
- Naalakkersuisunut ilaasortanngortut nutaat suliassaminnut sukumiisumik pulanissamminnut piffissaqarniassammata, oqartarpugut, sivikinnerpaamik qaammatini pingasuni tusagassiortunit eqqissisimatinneqartarmata, Kim Kielsen oqarpoq.
AAMMA ATUARUK Broberg angisuunik suliassaqarpoq
Pele Broberg Inatsisartunut ilaasortannguinnanngilaq, Nalakkersuisunngortussat tallimanngornermi ilisaritinneqarneranni aningaasaqarnermut naalakkersuisunngortussatut innersuunneqarpoq.
AAMMA ATUARUK Kim Kielsen isumalluarpoq
Kim Kielsenip qulakkeerlugu oqaatigaa, Pele Broberg aningaasaqarnermut naalakkersuisoqarfimmi sulileruni akisussaaffinnillu annertuunik unammillernartunillu suliaqalerpat Naalakkersuisut qanimut suleqatigalugit aaqqinneqarumaartut.
- Naalakkersuisunngortussat sulilerpata tapertaajumaarpugut, apeqqutissaqassappata assigiinngitsunik ikiortarlugit, Kim Kielsen oqarpoq, erseqqissaatigalugulu siullermiilinngimmat naalakkersuinermik siornatigut suliaqarsimanngitsumik naalakkersuisuutitaqarneq. - Pele Broberg suliassaminut kivitsisinnaanissaannut naatsorsuutigigakku ernumassutissaqanngilanga, Kim Kielsen Qanoruumi tallimanngornermi taama oqarpoq.