Kim Kielsen isumalluarpoq
Naalakkersuisunngortussat katiterneqarnerat Kim Kielsenip isumalluarfigai, Siumup partiit mikisut pingasut tamarmik immikkut siunertaqartut suleqatigilerpagit .
Partiit mikisut pingasut tamarmik immikkut assigiinngitsunik siunertallit peqatigalugit ataatsimuussusermik takutitsinissaq Kim Kielsen qanoq qulakkeersinnaaviuk?
- Tassa soorunami Naalakkersuisooqatigiit isumaqatigiissutaannut atsioqatigiipput, taava tassani tatigeqatigiilluta tamakkua suliat assigiinngitsut Naalakkersuisooqatigiit isumaqatigiissutaaniittut 350-t taakkua sulissutigissavagut. Atsiorneq pituttuineruvoq tatigeqatigiinnermut tunngatillugu. Taamaattorli aamma suleqatigiinnissaq anersaavanik tamatta peqarpugut.
AAMMA ATUARUK Naalakkersuisuni arlallit tupaallaataapput
Taava taanna atsioqatigiissut malinneqanngippat Kim Kielsen susoqassava?
- Tassa Naalakkersuisooqatigiinnut tunngatillugu assigiinngitsut suliat periarfissat ujartorneqassapput qanoq ittoqarsinnaanersoq. Kisianni pingaartupilussuuvoq tassani Naalakkersuisooqatigiit isumaqatigiissuterput tassa partiitut aamma parteeqatigut allat sinnerlugit isumaqatiginninniarnikuuvugut tassa partiit anguniagaannik, aamma partiit taakkua allat tassa taamatorluinnaq partiit sinnerlugit oqartuutit, taakkualu naaperiuussutigisimavagut taavalu 350-nik qulequtaqarlutik, Kim Kielsen taama oqarpoq.
Taava malinneqanngippata? Qinerseqqittoqassava?
- Oqippallaassaqaaq taamatut oqassalluni. Takulaariartigu. Suliassat tamatta uanga isumalluarfigivakka aamma Naalakkersuisooqatigiinnissamut tunngatillugu, suleqatigiinnissarput tamatta neriuuteqarfigaarput ajunngitsumik ingerlassasoq, Kim Kielsen taama oqarpoq.
AAMMA ATUARUK Naalakkersuisut nutaat takukkit