Jakob Janussen sivisuumik napparsimareerluni toquvoq

Nunatta namminersorneranut aqqutissiuussisut ilaat, Jakob Janussen, sivisuumik napparsimareerluni Frederiksbergip napparsimmaviani ullumi toquvoq.

Ilaqutaasut taama nalunaarput.

Jakob Janussen 81-inik ukioqalerpoq.

Jakob Janussen Namminersorneq pillugu kalaallit qallunaallu isumalioqatigiissitaata allattoqarfiata nunatsinni immikkoortortaanut pisortaasimavoq. Isumalioqatigiissitat namminersorneq pillugu inatsisissatut siunnersuutertik 2008-mi tunniuppaat. Inatsit taanna nunatta namminersortumik 2009-mi aqunneqalerneranut inatsisitigut toqqqammaviuvoq.

Taanna sioqqullugu Namminersornerullutik Oqartussani qaffasissumik assigiingitsuni akisussaaffeqartarpoq. Ilaatigut Sulisoqarnermut Pisortaqarfimmi pisortaavoq.

Jakob Janussen nunatta namminersorneq pillugu nammineq ataatsimiititaliarsuani, isumaliutissiissummik 2003-mi tunniussisumi, aamma siulittaasuuvoq.

Naalakkersuisut siulittaasorisimasaata Lars-Emil Johansenip Jakob Janussen oqaatsinik pingasunik ima ilaatigut eqqaamaava; Sukumiisoq, peqqissaartoq sullerissorissorlu.

Janus Janussen Aarhusip Universitetianiit naalagaaffimmi ingerlatsinermik 1974-imi ilinniagartuunngorpoq.

Taanna Ilisimatusarfimmi 2017-mi ataqqinaammik doktorinngorpoq.

Ilisimatusarfimmiit taama ataqqinninniarnermut ima tunngavilersuipput:

Jakob Janussenip inuiaqatigiit kalaallit akornanni pingaaruteqartumik qaammarsaanermut ilinniartitsinermut, politikkikkut sulinissamik ilusilersuinermi aammalu Namminersornerullutik Oqartussat ulluinnarni allaffissornikkut sullinneqarnerannut atatillugu suliarpassui tunngavigalugit matumani Ilisimatusarfimmi ataqqinaammik doktorinngortinneqarpoq.

Jakob Janussen naalakkersuinermi pissutsit KNR-imi nassuiaasartuuvoq.

Taassuma toqunerani nulia Estrid Janussen qitornai, Kristiane aamma Aputsiak, taavalu ernutaat tallimat qimagaapput.