'Ivalu' Oscarinnanngitsoq
Isiginnaagassiaq naatsoq 'Ivalu', Amerikamiut nersornaasiuttagaannik Oscarimik nalunaaqutarput malillugu unnuaq agguaassisoqarnerani pissarsinngitsoorpoq.
Oscarinnattoq tassaalluni filmeeraliaq 'An Irish Goodbye'.
Filmeeraliaq 'Ivalu' danskinit suliarineqartoq Anders Walterimillu ilitsersuisuuffigineqartoq piviusunngorpoq, filmiliortartfik Polarama Greenland, Pipaluk Kreutzmann Jørgensenimit siuttuuffigineqartoq peqatigalugu.
Polarama Greenlandip suleqataaffigaa kalaallinik filmiliortunik isiginnaartitsisartunillu peqataatitaqarnissaq.
Filmimi kalaallit ilaqutariit nunaqarfimmi mikisumi najugallit malinnaavigineqarput. Tassani qatanngutigiinni nukarlersap, Pipaluup angajuni Ivalu tammaaneqartoq pillugu ujarlernera oqaluttuarineqarluni.
Filmimi oqaluttuarineqarpoq, ilaqutariit avissaartuunnerat aamma ilaqutariit akornanni kinguaassiutitigut kannguttaatsuliornerit, tassani kalaallit oqaluttuaatitoqaat ilanngunneqartarlutik filmiliaalluni.
Isiginnaartitsisartut ilaat kalaallit tassaallutik Mila Heilmann Kreutzmann, Nivi Larsen, Angunnguaq Larsen aamma Tuperna Mette Larsen.
Filmimi inuttaasut Hollywoodimi 95-issaannik Oscarinnanniunnermut peqataapput. Isiginnaagassiaq ajugaanngikkaluartoq taamaattoq Oscarinnattussatut innersuunneqarnera isiginnaartitsisartup, Angunnguaq Larsenip nuannaarutigaa:
- Oscarinnattussatut innersuunneqarneq kalaallinut filmiliortartunut pingaaruteqarpoq. Tamannalu kalaallit filmiliortarnerannut annertunermik ammaassiumaartoq neriuutigaara, Angunguaq Larsen nutaarsiassaqartitsivmmut Ritzauimut oqarpoq.
