Oscarimik nersornaasiineq: Kalaallit oqaluttuassartassaannik oqaluttuassagaangatta uatsinneertassapput

Nersornaasiineq kiisami ullumi ingerlanneqalerpoq.

Oscarimit inuusaliaq kuultiusoq isiginnaagassiamut naatsuliamut “Ivalu”-mut, nunatsinni pinngortitamik kusanartumik assiliartaqartoq, ilaqutariillu avissaartuunnerannik qanigivallaakkamillu atoqateqarnermik  oqaluttuarinnittumut tunniunneqarsinnaavoq.

Naak isiginnaagassiami ilitsersuisoq, Anders Walter Danmarkimi inunngorlunilu peroriartorsimagaluartoq isiginnaagassiaq kalaallinit ikiorneqarani suliarineqarsinnaanavianngikkaluarpoq.

Isiginnaagassiarmi filmiortarfiup, Polarama Greenlandimit kalaallip filmiliortartup, ilitseruisartullu, Pipaluk Kreutzmann Jørgensenip suleqatigineratigut suliarineqarpoq.

Nalaatsornerinnaapajaartumillu suleqatigiittoqalersoq, Pipaluk Kreutzmann Jørgensen KNR-imut maanna oqarpoq.

Oqaluttuaq sakkortooq

Isiginnaagassiaq “Ivalu” niviarsiaqqamut Pipalummut (ilitsersuisumut paarlaanneqassanngilaq) qatanngutiminik Ivalumi ullaakkut nassaarinnissinnaangitsumut tunngassuteqarpoq.

Tamatuma kingorna ujaasineq aallartippoq, tassanngalu kalaallit oqaluttuaataat oqaluttualiaataallu atorlugit niviarsiaqqat marluk nunaqarfeeqqami sakkortuumik peroriartorsimanerat oqaluttuarineqarpoq.

Isiginnaagassiap oqaluttualiaq assiliartalik aamma taama ateqartoq tunngavigaa, taanna Skriverprisenimik, Danmarkimi Meeqqanut Ilinniartitaanermullu ministereqarfimmit 2020-mi nersornaaserneqarpoq.

Kalaallit nalaassimasaat sakkortuut - danskimit oqaluttuarineqartoq

Filmiliamik ilitsersuisartoq, Anders Walter Oscarimut aatsaat siullermeertumik innersuunneqartuniinngilaq.

Taassuma isiginnaagassiaq naatsuliaq Helium 2014-imi Oscarinnassutigaa. Isiginnaagassiami tassani Ivalu assigalugu meeqqap isaanit inuunermi aqqusaakkat sakkortuut takutinneqarput.

Naggueqatigiilli inuit oqaluttuassartaat danskimit ilumut oqaluttuarineqarsinnaava?

Ilitsersueqataasoq, Pipaluk Kreutzmann Jørgensen aperigaanni tamanna soorunami naaggaavoq.

- Kalaallit oqaluttuassartaraat, kalaallisut manuskripteqarpoq. Oqaluttuat taama ittut oqaluttuarineqassatillugit uagut oqaluttuartuussaagut. Qanigivallaakkamilli atoqateqarneq nunarsuarmi tamarmi ajornartorsiutaavoq, isiginnaagassiamiillu tamanna meeqqap pisuussutiginngikkaa siammarterneqassasoq neriuutaavoq, taanna KNR-imut oqarpoq.

Taassumali oqarnera naapertorlugu Anders Walterip tamanna eqqarsaatigiuarsimavaa. Taassumami isiginnaagassiaq kalaallimik suleqateqarani suliarerusussimanngilaa.

Pipaluk Kreutzmann Jørgensenilli ilitsersuisooqataanissaa pilersaarutaanngikkaluarpoq. Oqaatsilli Anders Waterip isiginnaartitsisartullu akornanni ajornartorsiutaasoq paasinarsivoq, taamaammat Pipaluk Kreutzmann Jørgensen ilannguppoq.

Pipaluk eqqorluartoq

Aamma 11-nik ukiullip, Mila Heilmann Kreutzmannip isiginnaagassiami Pipalummut inuttaanissaa nalaatsornerinnaanngilaq.

Taanna danskit isiginnaagassiaanni isiginnaartitseqataanikuuvoq, malugineqarluarlunilu.

- Mila piginnaasaqarluarpoq, ilitsersorneqarsinnaavoq, misigissutsinik takutitsisinnaavoq, angajoqqaavilu taperserluinnarneri uagutsinnut aamma pingaaruteqarluinnarpoq, sammisarmi sakkortuvoq, Pipaluk Kreutzmann Jørgensen KNR-imut oqarpoq.

Mila Heilmann Kreutzmannip nunatsinnik nersornaasiinermi annertumi saqqummiinissani aamma qilanaarutigaa.

- Ilumoortumik nuannersuaarpoq, filmimi takusarlugit Los Angelesimiittut taava nammineq taakaniilluta. Ullaaq sisamanut iteriarluta aneerpugut, nilliaannarluta pisulluta, arpaqattaarluta pississaarluta. Oscarinnannissaa neriuutigaara. Kalaallit Nunaannut aamma Danmarkimut angisoorujussuussaaq, Mila KNR-imut oqarpoq.

Nunatta peqataanissaa Pipaluk Kreutzmann Jørgensenimut aamma pingaaruteqartoq:

- Uannut peqataaneq soorunami angisoorujussuuvoq. Kisianni uanga anginerusumik assiliartalerlugu takuara. Naggueqatigiit Inuit Oscarimut peqataapput, nunarpullu aaqqissuussami taama angitigisumi aatsaat peqataavoq, saqqummiinerlu pingaaruteqarpoq. Nammineq oqaluttuassartatsinnik nammineq oqaluttuarnissarput suli unammissutigaarput, taanna oqarpoq.

Oscarimik nunatta nalunaaqutaa naapertorlugu unnugu nersornaasiisoqassaaq.