Ittoqqortoormiit qaammatini arlalinni nakorsaqannginnissaa ernumanartinneqartoq
Ittoqqortoormiini najugalik 72-nik ukiulik, Jonas Napatoq, uummamminik ajoquteqarnermi kingunerisaanik nakorsamik akulikittumik atorfissaqartitsisarpoq.
- Pisariaqartippara assorsuaq nakorsaq uanga, atorfissaqartippara iisartagaqarpunga taamannaannaq, Jonas Napatoq oqarpoq.
Nunatsinni nakorsassaaleqinerup kingunerisaanik Ittoqqortoormiit, 339-inik inoqartoq, juulimi aggustimilu nakorsaqarnavianngitsoq, Peqqinnissaqarfiup Sermersuup immikkoortuani nakorsat pisortaa Jesper S. Olesen oqarpoq.
- Nakorsanik nunatsinni atorfinikkusuttut ikippallaarnerat Ittoqqortoormiinut aamma sunniuteqarpoq, Jesper S. Olesen taama oqarpoq.
Nakorsaqanngiffianili peqqissaasoqartarnissaa peqqinnissaqarfiup sulissutigaa.
- Peqqissaasunik piginnaasaqarluartunik, Nuummi nakorsanut qanimut attaveqartuartussanik, inuttaliiniarsarivugut, nakorsaq oqarpoq.
AAMMA ATUARUK ”Peqqissuseq inuttut pisinnaatitaaffiuvoq; tamanut peqqissuunissaq piffissanngorpoq”
Innuttaasut ernumasarineqanngitsut
Illoqarfik avinngarusimasumiimmat, imaaliallaannarlunilu ukiorissinerani tikikkuminaasinnaassarmat, ernumassuteqartoqarpoq.
- Nakorsaqarnata taamatut pissagutta ajuuilluni ajorpoq, pisariaqavippoq nakorsaqassasugut. Maani taama avinngarusimatigisumiilluta, Jonas Napatoq oqarpoq.
Innuttaasulli ernumasariaqanngitsut, Peqqinnissaqarfiup Sermersuup immikkoortuani nakorsat pisortaa Jesper S. Olesen isumaqarpoq.
- Aaqqiisimanerput toqqissisimanarilluinnarparput. Innuttaasunut ernumasunut oqarsinnaavunga; ikiuunniarluta najuutissaagut, tamanna qularnangilaq. Peqqinnissaqarfik aamma Ittoqqortoormiiniippoq, ikiuukkusoqaagullu,
Jesper S. Olesen oqarpoq.
Ittoqqortoormiini decembarip qaammataani januaarimilu nakorsaqarsimanngitsoq Peqqinnissaqarfiup immikkoortuani nakorsat pisortaata Jesper S. Olesenip oqaatigaa.