Isumaqatigiissut nutaaq: Air Greenland angutinit arnanillu atorneqarsinnaasunik atisaqartitsilissasoq
Piffissami kingullermi eqqisiviilliortoqarpoq. Juullimut angerlamut angalasoqarsinnaassava?
Air Greenlandimimi saqisut FPU-p Air Greenlandillu akornanni nutaamik isumaqatigiinniarnermi isumaqatigiissinnaannginnerat pissutigalugu suliumajunnaarnissamik aarlerisaaruteqarnikuupput.
Pingasunngornermili isumaqatigiissusiortoqarpoq. Illuatungeriit Isumaqatigiissitsiniartarfimmut aggersarneqarput, tamannalu iluatsitsiviuvoq: Suliumajunnaartoqarniarnera taamaatiinnarneqarpoq.
AAMMA ATUARUK Air Greenlandimi isumaqatigiissusiortoqarmat suliumajunnaarnissaq taamaatiinnarpoq
FPU-p Air Greenlandillu isumaqatigiissut nutaaq ilorrisimaarutigigaluarlugu qanoq imaqarnera suli saqqummiussinnaanngilaat.
Suliaq naatsumik:
Novembarip 21-at: FPU saqisut sinnerlugit suliumajunnaartoqarnissaanik aarlerisaaruteqartoq Air Greenlandip oqaatigaa.
Novembrip 24-at: Suliumajunnaarnissamik aarlerisaarinerup tullia oqaatigineqarpoq.
Novembarip 29-at: Illuatungeriit Isumaqatigiissitsiniartarfimmi naapipput.
Novembarip 30-at: Illuatungeriit isumaqatigiissuteqarput.
Timmisartumi saqisut akissarsiaqarnerulernissaat FPU-p tunngavilersorpaa.
Air Greenland itigartitsinani sulisarfiit piffissaat aalaakkaannerunissaat kissaatigaa.
Qanoq isumaqatigiissuteqartoqarnersoq suli naluarput.
- Ilaasortatta Air Greenlandillu siulersuisuisa tamanna decembarip qulinganni taasissutigissavaat. Taamaammat taakku tamanit siulliullutik tusagaqarnissaat naleqqunnerpaavoq, FPU-mi siulittaasup tullia, Anders Mark Jensen KNR-imut oqarpoq.
Illuatungeriilli imikkoortoq ataaseq tamarmik oqaatigisinnaavaat. Saqisummi nutaanik atisaqalissapput, tassa arnanit angutiniillu atorneqarsinnaasunik atisaqalissaaq.
Arnanit angutiniillu atorneqarsinnaasunik atisaqalissasut
FPU-p atisat arnanit angutinillu atorneqarsinnaasut pillugit immikkoortoq namminneq isumaqatigiinniarnermi qaqissimagitsik oqaatigaa.
- Taanna piumasaqaatigaarput, tamannalu Air Greenlandip tigulluarpaa. Ataatsimut oqallisigaarput soorlu pingaaruteqarnera paaseqatigiissutigalutigu, Anders Mark Jensen oqarpoq.
AAMMA ATUARUK Strejken er afblæst: Nu er jeg sikker på, at min søn kommer fra Danmark til jul
Taassuma Air Greenlandip immikkoortumut tapersiinera nersualaarutigerusuppaa, timmsiartuutileqatigiiffiillu allat tamanna aamma isiginiartariaqaraat isumaqarpoq.
- Air Greenlandip sapiissuseqarluarluni arnanit angunillu atisarineqarsinnaasut pillugit politikkeqarnissamut nutaanik eqqarsaatiginneqataanera ilorrisimaarutigilluinnarparput, FPU-p siulittaasuata tullia oqarpoq.
Air Greenlandimi saqisut 2023-mi aasap ingerlanerani atulertussanik nutaanik atisartaartussaareerput. Timmisartuutileqatigiiffiup oqarnera naapertorlugu atisat arnanit angutinillu atorneqarsinnaasut timmisartuutileqatigiinni nutaalluinnartuupput.
- Ilisimasakka naapertorlugit timmisartuutileqatigiiffinni Danmarkimi nalunaarsorsimasuni Air Greenland siulliulluni arnanit angutiniillu atorneqarsinnaasunik atisaqartitsilissaaq, Air Greenlandip HR-imi pisortaa, Mads B. Christensen oqarpoq.
Taassuma atisanik suiaassutsimik takutitsinngitsunik imaluunniit periarfissanik marlunnik tassa anguterpalunnerusunik imaluunniit arnarpalunnerusunik sulisut ataasiakkaat namminneq aalajangersinnaasaannik periarfissalissasoq oqaatigaa.