Assimmi naalagaq: Isumaqarlunga ajunaalerluta

Sisamanngormat anorersualeruttoraa mallit 10 meterit tungaannut portussuseqaleruttortut aalisartut ilungersunartumik nalaataqarput. Tassami motooriiarput:

- Mallersorujussuusoq motoreqaratalu susinnaanatalu ingerlasinnaanatalu tissukaatserusaaginnaq, aalisariummi Aassimmi inuttaq, Aqqalunnguaq Wille oqarpoq.

-Umiarsuaq aqussinnaajuartaraluaratsigu. Allaassutaa massakkut ikiortissaqarnata motooriiaqqagatta neriuutaaruteqqalluta, malissuit qimarratigisinnaanagit, pitsaanerusumut sangusinnaanata. Eqqarsaaterpassuit tassani sarsuapput, aalisariummi naalagaq, Søren Lennert oqarpoq.

Ajutoortoqassappat ikiortissaqanngillat

Issittumi sakkutooqarfiup annaassiniartartui sisamanngornerup ualigaa sila atoruminarnerulerpat tallimanngornermi ajutoorfimmut apuunnissartik naatsorsuutigaat. 

Issittumik sakkutuut nalunaarutaat naapertorlugu sekundtimut 30 miiterinik sakkortussusilimmik anorlerpoq. 

-Sinerissami nakkutilliissut sanitsinnut pisimagaluartoq anorip sakkortunerpaaffiani arlaa maaniitoq oqarfigaara tassa ajutuujallakkutta ikiornissaqanngilagut, Søren Lennert oqarpoq, nangillunilu:

-Eqqarsaaterpassuit sarsuapput soorunami sarsusasaqaat. Ila inuttaqateqarlunga arfineq marlunnik. Ajutuujallassagaluarutta, malissuit ajortumik eqquallappatigut. Soorlu masseqqinngitsuusagaluarutta pusilluni soorlu umiarsuaq. Tamakkua eqqarsaatit aamma qanissinnaasaramik taamak sannikaannarsimalluni.

Aalisariummi aquttup Søren Mathæussenip aamma ilaatigut ernummatigilersimagaluarpaa inuttat annanniummukaassortariaqalernissaa.

-Kujammut kimmut sammigaluaratta. Qaarujussuaramitigut 180 grad-imik illuanut saalluta. Tassani eqqarsaleraluarpunga taamaaginnassappat tassa. Immaqa annanniutinut ikisariaqassasugut. Kisiani qujanartumik ataasiaanaq qaarujussuarami

Annakkuummerneq

Aalisariummi inuttat angalasaleramilli aatsaat taama misigisaqarnerlussimatigalutik oqarluttuarput. Issittumi sakkutuut ikiuiartorlutik tikimmata inuttap ilaat annakkuummerluni oqiliallassimaqaaq.

-Aallarummatigut eqqissiallaqaanga. Kisiani uani igalaap saavaniittugut aamma kittoqarami ernumanerup tikeqqikkaluarpaanga, Aqqalunnguaq Wille oqarpoq.

Kilisaammilu inuttat avaarsimannginnamik kilisaat raajarniarsinnaangorpat ilaaffigeqqissamaarpaat.

-Pisinnaagallartillunga inuttaagallassaanga.

Kujataani anorersuarnera pissutaalluni Polar Aassik Qaqortup umiarsualivianiikkallarpoq, qatsorpallu kalittaammit Nuummukaanneqartussaalluni.