Politikki Kulturi

Issittumik ilisimatusartoq: Qallunaat naalagaaffeqatigiinneq pimooruttariaqarpaat

Qallunaanik isumasiuinerup inernera ilimagisatsitut isikkoqarpoq, tassami qallunaat 25 procentiinnaasa aningaasarliornermit ikiussagaatigut isumaqaramik, Michael Böss, issittumi pissutsinik ilisimatusartoq isumaqarpoq.

Allattoq Camilla Dam

novembarip 25-at 2014 06:55

Nutserisoq Tikaajaat Kristensen

Taanna isumaqarpoq, Danmarki imminuinnaq piunnaarluni Kalaallit Nunaat siammasinnerusumik isiginiarneqarsinnaasoq.

- Danmarki "uagullu qallunaat" oqaluuserivallaarunnaartariaqarpagut. Tassunga taarsiullugu naalagaaffeqatigiinneq pimoorunnnerusariaqarparput, soqutiginninnerpullu takutillugu.

- Soqutiginninnerusariaqarpugut tapersersuerpalaartumik suleqatigiinneq pilersittariaqarparput. Kalaallit inuusuttut tamanna aamma angorusuppaat, Michael Böss DR-imut oqarpoq.

Politikerilli oqaluttuarisaanermi pisarnikut pillugit tunuarsimaarput.

- Nunasiaatiginikuugatsigu, qallunaat politikeriisa Kalaallit Nunaat pillugu oqaaseqarnissartik tunuarsimaarfigisarpaat, nunasiaatilittut pissusilersortuunerarneqarnissartik qunugigamikku. Tamanna qaangereersimasussaagaluarparput, taamaanngilarli, Michael Böss oqarpoq.

Aamma atuaruk Nunatta politikkikkut aqunneqarnera danskinit ilisimaneqanngilaq

Misissueqqissaartarfiup Wilkep Jyllands-Postenimut isumasiuinera naapertorlugu qallunaat affaasa missaat isumaqarput kalaallit politikeriisa nunartik ilorraap tungaanut aqussinnaanngikkaat. Wilkellu apersorsimasaasa sisamararterutaannaasa Danmarkimit akuleruffigineqarnata nammineq ineriartorneq ingerlassinnaagipput tatigaat.