Issittumi Sakkutooqarfik upalungaarsimasoqarnissaanik ujartuipput
Issittumi Sakkutooqarfimmi sulisunut pisortap tusarniaasoqarnerani kaammattuutigaa upalungaarsimanissamut periusissiamik suliaqartoqassasoq. Periusissialiortoqarsimeranik takussutissaqanngitsoq Issittumi Sakkutooqarfik oqarpoq.
- Aatsitassanik piiaaffimmi aatsitassarsiorfimmiluuniit sulisunik ajutoortoqarsinnaavoq taakkualu ikiorneqarnissaannut periusissiaqartariaqarpoq, Issittumi Sakkutooqarfimmi sulisunut pisortaq Jan F. Stripp oqarpoq.
- Ajutoortut aatsitassarsiorfimmi suliarineqartassappat? Napparsimmaveqassava imaluuniit aallanerunneqartassappat ? Taakkulu sumunngaanneqasappat kiallu tamakkua isumagissavai?, Jan F. Staff aperivoq.
Aamma atuaruk Ironbarkip piiaaviliorniarnera pillugu innuttaasunik ataatsimiititsilersut
Aatsitassanik piiaanissaq Namminersorlutik Oqartussanit akuerineqarpat, Issittumi Sakkutooqarfik Citronen Fjordenimi sulisussaqanngitsoq Jan F. Strippip erseqqissaatigaa.
Issittumi Sakkutooqarfik isumaqarpoq Ironbarkimi suliniummut atatillugu upalungaarsimatitanik pilersitsisoqartariaqartoq, aatsitassanik piaaffimmi sulisunik tammartoqaraluarpat ujaasisussanik, napparsimasut ajoqusersimasulluunniit aallarunneqarnissaannik piareersimatitsineq, kiisalu aatsitassat piiarneqartut assartorneqarneranni timmisartut umiarsuilluunniit ajutooraluarpata upalungaarsimasussanik.
Aamma atuaruk Vittus: Ironbark aatsitassarsionikkut piareersimanerpaasut ilagaat
Piiaanissamut akuersissummik qinnuteqaat suli ingerlanneqartoq, Aatsitassanut Naalakkersuisoqarfiup KNR-imut nalunarutigaa. Taamaattumillu upalungaarsimanissamut periussissiamik Ironbarkimut maannakkut piumasaqaateqanngitsoq. Piaanissamut qinnuteqaat akuerineqarpat aatsaat upalungaasimanermut periusissiaq suliarineqassasoq Aatsitassanut Naalakkersuisoqarfiup pisortaa Jørgen Hammeken Holm oqarpoq.
- Inissikkumaarpoq. Upalungaarsimanissamut pilersaarutip suliarineqarneranut attuumassutseqartut Ironbarkip peqataatissavai. Tamatumalu kingorna aatsitassanut oqartussaasut aatsaat akuersissutigissallugu.
- Taamanikkussamullu suliamut attuumassuteqartut tamarmik tusarniarneqarsimassapput ilanngutassaqarunillu periarfissaqarumaarlutik. Uagullu taamaaliortoqarsimanersoq eqqummaffigisussaavarput. Upalungaarsimanermut periusissiaqartoqanngippat aatsitassanik piiasoqalerunnanngilaq, Jørgen Hammeken Holm oqarpoq.
Aamma atuaruk Ironbarkip royaltymik akiliisussaannginnini aalajangiusimaannarpaa
Citronen Fjordenimi aatsitassanik piaaneq sivikinnerpaamik ukioq ataaseq qaangiuppat aatsaat aallartissinnaasoq Aatsitassanik Naalakkersuisoqarfiup pisortaata aamma oqaatigaa.
