Ironbarkip royaltymik akiliisussaannginnini aalajangiusimaannarpaa
Ingerlatseqatigiiffiup Namminersornerullutik Oqartussanut isumaqatigiissutimini suliffeqarfittut akileraarutinik akiliuteqartussaanini maliinnarniarpaa.
Aatsitassarsioqatigiiffiup Namminersornerullutik Oqartussat 2007-imi isumaqatigiissuteqarfigai, Nunatsinni suliniutinut angisuunut royaltymik akiliuteqartitsinerup eqqunneqarnissaa ukiunik arlalinnik sioqqullugu.
AAMMA ATUARUK Zinkimik piiaanissamik isumaqatigiissummi Royaltymik akiliuteqannginnissaq amigaataavoq
Ironbark Zink Nunatta avannaarsuani qeqertaasami Peary Landimi Citronenfjordimi suliniutimi angisuup isumalluarnartup aallartinnissaanut aatsaat taama qanitsigisilersoq, Atuagagdliutini allaaserineqarpoq.
Namminersorlutillu Oqartussat kissaatigisaattut ingerlatseqatigiiffik nunatta karsianut royaltymik akiliinianngilaq, isumaqatigiissummili suliffeqarfittut akileraarutinik akiliuteqartussaanini maliinnarniarlugu.
- Akuersissummut piumasaqaatit atsiukkavut Citronenfjordimi misissueqqissaarnermut akuersissummut, maleqqissaarsimasatsinnut, atatillugu royaltymik akiliuteqartarnissamik piumasaqaatitaqanngillat, Ironbarkip pisortaa Jonathan Downs Atugagdliutinut mailikkut taama allappoq.
Aamma atuaruk Ironbark zinkimik aqerlumillu piiaariaannanngortoq
Royalty "akileraarusiineq sianiitsuliornerusoq"
Syddansk Universitetimi lektorip Knud Sindingip, aatsitassarsioqatigiiffiit akileraartitaasarnerannik ilaatigut ilisimatusartup, Ironbarkip pisortaa ilalerpaa.
Knud Sindingip royaltyqartitsineq "akileraarutit sianiilliornertut" taavaa. Suliffeqarfittummi akileraarutinik akiliuteqartussaanerup akerlianik ullormit piaanerup aallartinneranit ingerlatseqatigiiffiit nunatta karsianut akitsuummik akiliisussaassammata.
Knud Sindingip taamatut akileraarusiineq marluinnarnik siunertaraqarnerarpaa - akilerneqassasoq piumasaqaatigissallugu ajornanngitsuuvoq ingerlaannarlu aningaasarsissutaassalluni. Aatsitassarsioqatigiiffiilli akileraarutinik akiliisalinnginnerminni sinneqartooruteqaqqaarnissartik ornigineruaat.
- Tamanna nunap karsianut ajunngivippoq, naalakkersuisuutitaqartulli tamatuminnga kimigiisissutiginnissappata sianiilliornerulluinnassaaq, lektor Knud Sinding Atuagagdliutinut taama oqarpoq.
Aammattaa oqaatigaa Kalaallit Nunaat aalajangiusimannippat Ironbark Zinkip aningaasaliisussarsiornera ajornarsilluinnarsinnaasoq.
