Issittumi Sakkutooqarfik: Iluatsitseqqinnissarput neriuutigaarput
Arfininngorpat Unnuk Kulturisiorfimmi nunatsinni aaqqissuussat 51-it missaanniissapput.
Nunatsinnilu suliffeqarfiit ulluinnarni alakkarneqarsinnaaneq ajortut paasisaqarfigerusukkukkit pulaarsinnaassavatit.
Issittumi Sakkutooqarfik Nuummiittoq suliffeqarfiit pulaarneqarsinnaasut ilagissavaat. Pulaaruit Siriuseqarfimmiut sulinerminni nerisarisartagaat ussersinnaavatit, Grønlandsvogterne paasisaqarfiginerullugit sakkutooqarfiulluunniit umiarsuanut alapernaarsuummut ikisinnaavutit.
Tassa imaappoq Issittumi Sakkutooqarfiup ujaasisoqartillugu suliaqartarnerata saniatigut susassaqarfii qaamaasaqarfiginerulersinnaavat.
- Nunami, immami silaannarmilu sulisaratta sorpassuarnik suliassaqartarpugut. Ujaasisoqarnerani sulisarnerput ilisimaneqarnerugaluartoq taassuma saniatigut pisussaaffippassuaqartarpugut, sakkutooqarfimmi aqutsisut ikiortaat aamma Unnuk Kulturisiorfimmi sakkutooqarfimmi aaqqissuisoq, Katrine Schmidt oqarpoq.
Innuttaasunut qaninneruneq
Sakkutooqarfik Unnuk Kulturisiorfimmi arlaleriarluni peqataasareerpoq, siornalu aaqqissuussaq soqutigineqarluarmat tupaallaatigaat.
- Unnuk Kulturisiorfimmi peqataasarnerput nuannarisarparput, suliarisartakkagummi oqaluttuarerusuttarpagut innuttaasunullu qaninnerulernissatsinnut periarfissaraarput.
- Inuusuttut sulerisarnitsinnik paasinnikkusuttut ukioq manna amerlassasut ilimagaara, aamma tunngaviusumik ilinniarfik nutaaq tusarsaasoq paasisaqarfigineqarusussaqisoq ilimanarpoq, Katrine Schmidt oqarpoq.
Ilinniarfissaq 15-inut inissaqarpoq, qinnuteqartulli 200-juupput. Kangerlussuarmi ilinnialersussat siulliit maajimi aallartissapput.
Siorna Unnuk Kulturisiorfimmi inuit 1850-it sinnerlugit pulaarmata iluatitsilluarfiuvoq, ukioq mannalu aamma taama soqutigineqartiginissaa Katrine Schmidtip neriuutigaa.
Sakkutuut alapernaarsuutaat umiarsuaq siorna ikkivigineqarsinnaasoq soqutigineqarluaqaaq. Inuimmi 1000-it sinnerlugit ikisimapput, umiarsuarlu alapernaarsuut suliakkerneqarsimanngippat ukioq maanna aamma pulaarneqarsinnaassasoq Katrine Schmidt oqarpoq.
Issittumi Sakkutooqarfiup saniatigut naapinneqarsinnaasut allat ilagaat nunatsinni ulloriarsiornermut ilisimatooq siulleq, Ivalu Barlach Christensen, Maniitsumi Jehovap Nalunaajaasui aamma Nuummi, Uummannami, Upernavimmi, Qaqortumi Qasigiannguanilu Royal Arctic Line alakkarneqarsinnaassaaq.
Air Greenland aamma aaqqissuussinerminni qasillaanartoqartsitsiniarput. Tassami Chili Klaus aqqusaassaaq ullullu ingerlanerani marloriarluni chilitussaq. Pisortaanerlu Jacob Nitter ilaatigut chilitoqatigissamaarpaa.
