Issittumi nunat inoqqaavi pillugit atuagaq nutaaq ullumi saqqummersinneqassasoq
![](/sites/default/files/styles/image_934x467/public/2024-08/Photo2.jpeg?h=cc3b566e&itok=1vg6YU9H)
Ullumi ulloq nunarsuarmi nunat inoqqaavinut ullorititaavoq.
Tamanna atuakkamik nutaamik "Empowering Arctic Indigenous Peoples – Celebrating 50 Years of Indigenous Diplomacy"-mik qulequtalimmik saqqummersitsinikkut malunnartinneqarpoq.
Atuagaq taanna Issittormiut naalakkersuinikkut naalagaaffiit akornanni ukiuni 50-ini kingullerni sulinerat pillugu oqaaseqaatinik, allaatigisanik eqqaamasanillu imaqarlunilu Issittumi Nunat inoqqaavisa suleqatigiinnerisa siunissami nanginneqarnissaanut qiviarfiusoq, ICC Kalaallit Nunaat tusagassiorfinnut nalunaarummini allappoq.
Ilulissani siorna ataatsimeersuartut
Issittumi nunat inoqqaavisa ukiuni 50-ini suleqatigiinnertik Ilulissani siorna ataatsimeersuarnerminni nalliuttorsiutigaat. Inuit Issitttormiut Københavnimi 1973-imi ataatsimeersuaqatigeeqqaareernerminniit maannamut angusatik Ilulissani ataatsimeersuarnermi misissutaarpaat, takorluukkamissullu angusaqarsimanerlutik eqqartorlugu.
Tamakkuupput atuakkami nutaami tassa akissutissarsiniarneqartut.
- Nunat inoqqaavisa namminneq politikkikkut oqaluttuassartaminnik saqqummiussinissaat pingaaruteqartorujussuuvoq, ICC-p siulittaasua Sara Olsvig oqarpoq.
- Issittumi nunat inoqqaavisa siuttuisa ukiorpassuit ingerlaneranni angusarpassuinik assut pingaarutilinnik nuannaarutiginittarnerput qaqutigoorpallaarujussuarpoq. Atuakkiornikkut neriuutigaarput Issittumi naalagaaffiit akornanni sulinerup aqutsinerullu tamatigoornerusumik ilisimaneqalernissaanut ilapittuuttaassasugut.
Saqqummersinneqarnera Facebookimi malinnaaffigineqarsinnaassasoq
Atuagaq nutaaq Pawanka Fundimit taperneqarnikkut piviusunngortinneqarsinnaasimavoq. Inuit Issittormiut Siunnersuisoqatigiiffiat, Saamit Siunnersuisoqatigiiffiat aamma International Work Group for Indigenous Affairs (IWGIA) saqqummersitsisuupput.
Atuagaq taanna ullumi tallimanngornermi aggustip qulingiluaani nunatsinni nalunaaqutaq malillugu ualikkut tallimanut saqqummersinneqassaaq. Tamanna ICC Kalaallit Nunaata Facebookimi qupperneratigut toqqaannartumik malinnaaffigineqarsinnaassaaq.