Issittumi nunat inoqqaavi kulturitik nukittorsarumagaat
Katerittut issittumi nunat inoqqaavi oqaatsit, kultuuri nunasiaataaneq siunissamullu pilersaarutit ilaatigut naapeqatigiissutigaat.
Nunatsinneersut 15-it peqataapput. Taakkunanngalu isiginnaartitsisartoq, pissarsiaqarluarsimasoq tupaallassimaqisorlu ilaavoq.
- Katerittugut tamatta qanoq assigiiffeqartiginerput tupaallannarnerpaavoq. Saamit maanilu Canadami nunap inoqqaavisa oqaluttuassartagut qanoq assigiitsiginersut tamattalu naqisimaneqarnikuunerput naapiffigivagut, Isiginnaartitsisartoq Hans-Henrik Suersaq Poulsen taama oqarpoq.
Katerinneq Arctic Arts Summit 2022 Canadami Whitehorsemi ulluni pingasuni, juulip 27-anit 29-anut issittormiunut naapiffiuvoq.
- Ataatsimoornerput nuanneqaaq. Kalaallit, akilinermiut canadamilu nunat inoqqaavi sutigut tamatigut naapeqatigiilluarsinnaavugut, Hans-Henrik Suersaq Poulsen oqarpoq.
Qulequttat assigiinngitsut katerinnermi eqqartorneqarput, soorlu: Issittumi najugaqarneq, eqqumiitsuliorneq oqaatsillu Hans-Henrik Suersaq Poulsenip oqalliseqataaffigai.
Siunissamilu pilersaarutit aamma eqqartorneqarput. Kateriffiusumi Whitehorsemi meeqqat siulimik oqaasiinik atuiunnaarsimanerat ajornartorsiutaasoq takuaat, taamaammat iliuuseqarnissamik isumaliuteqarput.
- Assersuutigalugu maani Whitehorsemi utoqqaat oqaatsitik atorpaat. Meeqqallu oqaatsiminnik atuiunnaarsimasut ukiuni tulliuttuni qulini ilinniartinneqarnissaat siunnerfigaarput.
Katerinnermi Kultureqarnermut Naalakkersuisoq, Peter Olsen, Katuaq, NAPA, Ilisimatusarfik, Nunatta isiginnaartitsisarfia, Nunatsinni eqqumiitsuliortut peqatigiiffiat kiisalu Eqqumiitsuliornikkut pinngorartitsisut Ingerlatsisullu EPI peqataapput.
