Assi: NASA

Canada Issittumi ilisimatusarnermut millionerpassuarnik aningaasaliisoqartoq

Issittumi ilisimatusartoqarnissaanut millioninik pingasunik kisitsitalinnik aningaasaliisoqarpoq. Ilisimatusarfiit ataqatigiiaat ilisimatusarnissamut aningaasassarsisut Canadami naggueqatigiit inuit qanimut suleqatigaat.

Canadami ilisimatusarfiit ataqatigiiffiat, ArcticNet Issittumi ukiuni tallimani ilisimatusarnissamut canadamiut naalagaaffiannit 160 millionit koruuninik aningaasaliiffigineqarpoq.

Aningaasat tunniunneqartut amerlassusaat Issittumi silap pissusiata allanngoriartulernera ilutigalugu Issittumi ilisimatusarnissap qanoq pisariaqartigilerneranut takussutissaasoq, ArcticNetimi ilisimatusartut siuttuat, Professor, Louis Fortier KNR-imut oqarpoq.

Issittoq nunarsuarmi silap pissusiata allanngoriartorneranut takussutissaqarnerpaavoq. Canadap issittortaani suliffissualersuinerup aallartinneraniit gradinik pingasunik kiannerulersimasoq, ilisimatuut misissuinerisa kingulliit takutippaat.

ArcticNetip naggueqatigiit inuit nunaqarfii sisamat qanimut suleqatigai naggueqatigiillu inuit ilisimatusarnermi pingaarnersiugaannik tusaaniaasoqarnissaanik ilisimatusarnerillu inernerisa naggueqatigiit inuit illoqarfianni peqatigiiffinnut utertinneqarnissaannik qulakkeerisussanik nunap immikkoortuanit tamanit naggueqatigiinnit inunnit sinniisoqarpoq.

ArcticNet ukiuni tulliuttuni tallimani marlunnik pingaarnerutitaqartussaavoq. Pingaarnerutitaq siulleq Issittumi atorluaanikkut imaatigut assartuinermi, aalisarnermi, takornariaqarnermi aatsitassarsiornermilu attanneqarsinnaasumik ineriartornermut tunngavoq.

Aappaalu naggueqatigiit inuit nunaqarfigisaanni sisamani qaffasinnerusumik ilinniarnerit ilisimatusarnerillu annertusiartornissaasa ineriartortinnissaannut tunngalluni.

ArcticNetimit ilisimatusartut Pinngortitaleriffik Nunatsinnilu Ilisimatusarfik siusinnerusukkut suleqatiginikuuaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat