Issittoq pillugu pissaaneqarniunnermi Danmark oqaloqatigineqassaaq
Issittumi Siunnersuisoqatigiit ukiunik 20-nngortorsiornerat nalliussiniarlugu nunanut allanut ministerit qaaqqusallu nuimasut allat Tromsømi ulluni makkunani katersuuteqqaneranni, Inuit Ataqatigiit siulittaasuata Sara Olsvigip Issittumi Siunnersuisoqatigiinni pissaanerup katitigaanera apeqquserpaa.
Olsvig naapertorlugu, Issittumi Siunnersuisoqatigiinni siunissami aalajangiisoqassatillugu tamanna illoqarfissuarni soorlu Københavnimi Washingtonimiluunniit pisassanngilaq, Issittumili innuttaasut nunallu namminersortut aalajangiisinneqartassallutik.
Inatsisartut Nunanut allanut Sillimaniarnermullu ataatsimiititaliaanni siulittaasup Justus Hansenip Inuit Ataqatigiit isumakuluuteqarnerat isumaqataaffigaa.
Tamatumali oqallisiginissaanut Danmark siulliunneqartariaqarsoraa, Nunatsinnut nunanut allanut politikkikkut akisussaaffik Danmarkimiimmat.
- Isumaqarpunga danskit naalagaaffiat Nunatta nunanut allanut politikkikkut peqataatinnissaa ammaffiginerullugulu pikkoriffiginerusariaqaraa. Maannakkummi atorfilittatigoortumik ingerlatsisoqarpoq, uangali, Inatsisartut Nunanut allanut Sillimaniarnermullu ataatsimiititaliaanni siulittaasutut, ilisimasanik apuussivigineqartarnissarput angorusunneruara. Danmarkimimi qinikkat Nunatsinnilu qinikkat akornanni ilisimasanik tunniussisarnerup assigiinngissuteqarnera ajoraluartumik takusinnaavarput, Justus Hansen Tromsømi ataatsimeersuarnermi aamma peqataasoq KNR-imut taama oqarpoq.
Aamma atuaruk Issittumi Siunnersuisoqatigiinni pissaaneq assigiinngitsunik isumaqarfigineqartoq
Vittus: Issittumi Siunnersuisoqatigiit siunnersuiinnartussaapput
Inuit Ataqatigiit siulittaasuat ilaatigut saamit inatsisartuini siulittaasumit isumaqatigineqarpoq, taassumali Issittumi Siunnersuisoqatigiit aamma nersualaarpai nunani tamalaani suleqatigiiffinni kisiartaallutik nunap inoqqaavinik isumaqatigiinniarnerni peqataatitsisarnerat pillugu.
Sara Olsvigip isumakuluuteqarnera nunanut allanut naalakkersuisup Vittus Qujaukitsup (S) aamma isumaqataaffigaa.
- Issittumi nunap inoqqaavisa sunniuteqaqataanerisa nalinginnaasumik annikitsuaraaneranik isornartorsiuineq isumaqataaffigaara. Nunatta sunniuteqaqataannginneranik oqassalluni immaqa ingasappallaarpoq, Issittumimi Siunnersuisoqatigiinni suut oqaluuserineqarnissaat sunniuteqaqataaffigaarput. Kisianni ima paasineqassanngilaq maanna inissisimanerput naammagigipput.
Aamma atuaruk Issittumi Siunnersuisoqatigiinni suleriaaseq Olsvigip allanngortikkusukkaa
Justus Hansen (D) assingalugu Qujaukitsoq isumaqarpoq pissaaneq pillugu apeqqut Danmark oqaloqatigineqartariaqartoq Issittumi Siunnersuisoqatigiit iluanni qaqinnagu.
- Issittumi Siunnersuisoqatigiit aalajangiisartuunatik siunnersuisuunerat eqqaamaneqartariaqarpoq, tassani Issittumi pissutsit oqallisigineqartarmata. Taamaammat Issittumi Siunnersuisoqatigiit aalajangiinernut piginnaatitaanerat killeqareerpoq.