Issittumi Siunnersuisoqatigiinni suleriaaseq Olsvigip allanngortikkusukkaa
Danskit kalaallillu politikeriisa EU nunallu allat Issittumut aningaasaliinissaannut kajumissaaraat, Sara Olsvig isumaqarpoq Issittoq pillugu aalajangiisartut tamaanngaanniit ungasillingaluttuinnartut.
Annilaangatigaara Issittup kujataani illoqarfiit pingaarnersaanni - tassa Moskvami, Washingtonimi Københavnimilu - Issittumi Siunnersuisoqatigiinni pissaanerup tigugaluttuinnarneqarnissaa. Taamaattumik Issittumi Siunnersuisoqatigiit unammilligassaqartupilussuupput eqqanaassallugu Siunnersuisoqatigiit Inuit issittormiut inuiaqatigiillu Issittumiittut sinniisuuffigigamikkit.
Inuit Ataqatigiit tapersersorpaat aningaasaliisinnaasut Issittumut isiginerunissaat.
Inuilli issittumiittut namminneq aalajangiisinnaanerannut tamanna akorngusiissanngitsoq.
Taamaattumik nunat Issittumi Siunnersuisoqatigiinni ilaasortat aalajangersimasut arfineq pingasuusut oqallisigisariaqarpaat Siunnersuisoqatigiinni kikkorpiaat aalajangiisartuussanersut.
- Isumaqarpunga Issittumi Siunnersuisoqatigiit oqallisigisariaqaraat kujammut naalagaaffiit issittumiittut illoqarfiisa pingaarnersaannut pissaaneq suli nutserneqaannassanersoq, imaluunniit Siunnersuisoqatigiit aaqqissuunneqarneratigut eqqanaassaneraat Issittumi nunat namminersortut soorlu Kalaallit Nunaata pissaanermut ilanngunneqarnissaa, Sara Olsvig KNR-imut taama oqarpoq.
Aammattaaq Issittumi Siunnersuisoqatigiinni alaatsinaattutut ilaasortat taama pisariaqarput. Ullumikkummi India Singaporelu ataatsimiinnerni issiaqataasarput. Inuit Ataqatigiilli aalajangiissappata alaatsinaattutut ilaasortat Issittumeersut ataatsimiinnerni oqaaseqarsinnaasutut siulliutinneqartariaqarput.
- Unnersuussutigissavara alaatsinaattutut ilaasortat agguataarneqarnissaat, alaatsinaattutut ilaasortat peqataajuaannarsimasut - Issittumeersut issittormiullu sinniisaasa - oqaaseqarsinnaanerat atuutiinnassasoq. Taava oqartariaqarpugut, assersuutigalugu oqaaseqarsinnaaneq eqqarsaatigalugu EU Indialu kingulliutilaarlugit.
