Israelip sakkutuuisa al-Shifap napparsimmavia pakasaallutik misissuiffigigaat

Israelip sakkutuuisa Gazami napparsimmaviit annersaasa, al-Shifap napparsimmavia, pakasaallutik misissuiffigilerpaat, init tamaasa misissuiffigalugit. Misissuinertillu sisamanngornermi nangippaat.

Israelimi sakkutuut sinnerlugit atorfilittat ilaat, napparsimmavimmik misissuereernerup kingorna aqaguani taama oqarpoq:

- Peqqarniisaarniat sakkui napparsimmaveqarfimmi toqqortarineqarsimasut paasivarput, atorfilittaq oqarpoq.

Gazami napparsimmaviit illersornissaqarfimmit atorneqarneq ajortut, Palæstiinamiut islamisiortut Hamasimeersut erseqqissaatigaat.

Israelip napparsimmaviup nalaani pissusilersuutai nunanit tamalaanit ernummatigineqarpoq, toqutaasoqarsimaneranimmi nalunaaruteqartoqarmat, pissutsillu innuttaasunut ernummatigineqarlutik.

Israelip sakkutuui napparsimmavimmut pingasunngornermi isaapput, Hamasikkullu qitiusumik katersuuttarfigisimasaannik Israel nassaarsimanerarpoq.

Israelip oqaasii ilumoornersut, nunani tamalaani nutaarsiassaqartitsiviit uppernarsarsinnaasimanngilaat, tamannami ajornakusoormat.

Hamasikkut napparsimmaviup ataani sulluliorlutillu nakkutilliiviliorsimasut, Israelip siusinnerusukkut oqaatigaa.

Sulluliortoqarsimaneranilli takussutissaqanngilaq, naak Israel oqaraluartoq napparsimmaviup ataani sulluliaqartoq.

Sulluliortoqarsimasorli Israelip illersornissaqarfiata sisamanngornermi unnukkut ilisimatitsisutigaa, biilit sakkunik usisoq napparsimmaviup ataani sulluliat ilaanni siumorneqarsimasoq oqaatigalugu.