Israelip Hamasillu sorsunnerisa nunatsinni inissianik tuniniaaneq sunneraa

Takorlooruk illu pigilerusutat tuniniarneqalersimasoq takullugu. Igalaavani allaqqavoq - Tuniniagaq, takusavillu pilluaammernermik misigitilerpaatit. Uani najugaqarusupputit, ernialli ukiuni qulikkuutaani taamak qaffasitsiginikuunngillat.

Tamannalu illunik tuniniaasartunut, ingamillu siullermeerlutik illusiniartunut sunniuteqarpoq.

Pisisinnaassuseqarluartuinnaalli illusisinnaapput.

Illusinermi kreditlånimut erniat siorna 2 %-iupput, 1%-ikkaarlugulu piffissap ingerlanerani qaffaqattaareerlutik maanna 5%-iupput.

Sorsunnerup illuerniarneq sunneraa

Nunarsuarmi pissutsini allanngortoqarnera ernianik qaffaanermut peqqutaaqataasoq, illunik tuniniaasartoq Lyngesimillu piginnittoq Miki Lynge nassuiaavoq.

Ruslandip Ukarinimut sorsunnera, minnerunngitsumillu Israelip Hamasillu sorsuunnerat nunarsuarmi aningaasat naleerukkiartorneranut peqqutaasut taassuma ilanngullugu oqaatigaa.

Tamannalu illuerniarnermik ajornarnerulersitsivopq.

-Ilai sukkasuumik tunisarpagut, aammali ilaqarpoq marloriaammik pingasoriaammilluunniit tuniniartarneri ukiup ataatsip qaangiunneranut sanilliullugu sivisunerulertut, Miki Lynge oqarpoq.

Illusisinnaasut ikilisut

Illusisinnaasoqarneruleqqullugu realkreditsimut erniat appartinneqaqqinnissaat Miki Lyngep kissaatigaa.

-Erniat qaffanneqarneri pissutaallutik illunik pisisinnaasut ikilipput, tassami qaammammut akiliutaasartut annertunerulertarput taamaasillunilu illunik pisisinnaasut ikilisarput. Erniat apparteqqinneqarnissaat kissaatigaara, taamaasillunimi inuit amerlanerit illunik pisinissaat periarfissaalissammat.

Illunik suli tunisisoqartaraluartoq, erniat qaffammata inuit mianersornerulertut Grønlandsbankenimi atuisunut sullissisut pisortaat Jimmi Johannesenip KNR-imut oqaatigaa.

- Illunimmi suli niuertoqarpoq, tamannalumi malugisinnaavarput, taanna oqarpoq nangillunilu:

-Malugisinnaavarpulli sullitavut mianersornerulaalertut erniat orsussallu akii qaffammata soorlu eqqarsarluaqqissaarnerulertut namminneq pisinissaminnut piffissaanersoq, Jimmi Johannesen oqarpoq.

Erniat aningaasat naleerukkiartornerannik akiuisut

Erniat ukiuni kingullerni 13-ini aatsaat taamak qaffasitsigeqqittut.

Nunarsuarmi aningaasaqarneq maannakkut allanngormat aningaasat naleerukkiartulerput.

Nunatsinnilu aningaasat naleerukkiartornaversaaqullugit erniat qaffanneqartut, Jimmi Johannesenip KNR-imut oqaatigaa.

- Nunarsuarmi aningaasat naleerukkiartornissaat pinaveersaartinniarlugu erniat qaffanneqartarput, tamannalu maannakkut nunarsuatsinni pivoq. Nunatsinni erniat allatuulli qaffatsiginngikkaluartut kreditlåneqartunut malunnaataavoq, taanna oqarpoq.

Erniat qaqagu appartinneqarnissaat nalunartuaannarpoq, maannakkulli siullermeerlutik illusiniartut naammagittartariaqassapput.