Israelip Gazap nalaani najugaqarfiit aqutsisuuffigeqqilerai

Israelip sakkutuuisa Israelimiut Gazap nalaani najugaqarfii aqutsisuuffigeqqilerpaat. Israelimiullu sakkutuuisa Hamasikkullu akornanni Israelimi sakkuaattoqarunnaarluni.

Tuluit aviisisa ilaat The Guardian taama allaaserisaqarpoq, Israelip illersornissaqarfiata oqaaseqartitaa Daniel Hagari tassani issuarneqarpoq.

Hamasikkulli Israelimiullu sakkutuuisa akornanni tamani tamaani suli sakkuaattoqallattaasoq oqaatigineqarpoq.

Hamasikkut Israelimik arfininngornermi ullaakkut saassussilerput. Raketinik igeriussisoqarpoq, sakkuaakkumatuullu Gazamit Israelimut ilaatigut isaallutik.

Sakkuaakkumatuut islamisiortut Gazap ungasinngisisaani Israelip kujasissuani illoqarfeeqqanik najukkanillu kingorna tiguaapput.

Hamasimeersut Israelimiut ilaat sallunaveeqqutitut tigusimasagaat Israelimi aviisip Haaretzip sapaammi allaaseraa.

Taassuma saniatigut inuit ikinnerpaamik 100-t Hamasimiunit Gazamut aallarunneqarsimapput.

Israelimi Gazamut killeqarfiup nalaani festivalertoqartoq Hamas saassussivoq, inuillu toqutaasimasut 250-it 260-illu akornanni festivalerfiup nalaani siumorneqartut Haaretzip Times of Israelillu allaaseraat.

Inuit 700-t missaat Israelimi toqutaasimasut oqartussat kisitsisaataasa takutippaat, taakkunannga sakkutuut ikinnerpaamik 73-iusut tuluit nutaarsiassaqartitsiviata Reutersip allaaseraa.