Israel FN-imi eqqartuussivimmit naalakkerneqaraluarluni Gazamik qaartartumeerisoq

Israelip Gazami sumiiffiit arlallit, illoqarfik Rafah taakkununnga ilaalluni, arfininngornermi qaartartumeerpai naak saassussinerup piaarnerpaamik unitsinneqarnissaanik piumasaqarfigineqaraluartoq.

Gazami sakkuaakkunnaarallartoqarnissaa pillugu atorfilittatigut Parisimi isumaqatigiinniartoqartoq taassuma saniatigut oqaatigineqarpoq. Naallu Israel Naalagaaffiit Peqatigiit eqqartuussiviisa qullersaannit naalakkerneqaraluarluni Gazamik qaartartumeeriuarsinnarpoq.

Hamasip sallunaveeqqutitut tigummiaasa iperarneqarnissaat pillugu Israelip Hamasillu akornanni isumaqatigiinniarnerit sapaatit akunnerata tulliani aallartinneqassasut Jerusalemimi atorflittanit tusarfiit oqaatigaat.

Israelip isertortumik paasiniaasartuisa Mossadip qullersaata, USA-p isertortumik paasiniaasartuisa CIA-p qullersaannik Qatarillu ministeriuneranik oqaloqateqareersorlu taama aalajangertoqarpoq.

Eqqartuussiviup aalajangigaa pisussaaffiliisoq

Nunat tamalaat eqqartuussiviata Haagimiittup peqqussutai inatsisitigut pisussaaffiliipput, pisussaaffiilli eqquutsinneqarnersut toqqaannartumik qulakkeerneqarsinnaanatik. Assersuutigalugu Rafahmik saassussisoqaannassappat tamanna Palæstiinamiut piuneerutsinneqaratarsinnaanerannut kinguneqarsinnaasoq eqqartuussiviup oqaatigaa.

- Israelip saassussinini allatigulluunniit Rafahmik saassussinini ingerlaannartumik unitsittariaqarpai, peqqussummi ilaatigut atuarneqarsinnaavoq.

Eqqartuussiviup aalajangigaa malissimanerlugu, Israelip qaammatip ataatsip ingerlasimannginnerani nassuiaateqarfigisariaqassavaa.

Israelip Rafahmi iliuuserisani allanngortinniarnerai takuneqarsinnaanngilaq. Tassanimi pissutsit piviusut paasisimanngikkai Israelip erseqqissaatigaa.

- Naalagaaffiit Peqatigiit eqqartuussiviata Gazap kujasissortaa pillugu aalajangigaa malinneqartussaavoq, EU-p nunanut allanut tunngasunut qullersaa Josep Borrell oqarpoq.

Hamasip islamisiortullu allat sallunaveeqqutitut tigummiaasa ingerlaannartumik iperagaanissaat nunat tamalaat eqqartuussiviata naalakkiutigaa.

- Nunat tamalaat eqqartuussiviata aalajangigaa illuatungeriinnut tamanut pisussaaffiliivoq, malinneqartariaqarput, piaarnerpaamillu, Borrell erseqqissaavoq.

Palæstiinamiut 1,5 millionit pallillugit Gazap kujasissuani illoqarfimmi Rafahmi ukiuunerani upernaamilu najugaqarsimapput, taakkunannga meeqqat 610.000-t missaat.

Tamaaniittut amerlanersaat Gazami sumiiffinnit allanit qimaasuupput, toqqini, najugaqarfigigallagassanilu inissisimallutik, ilaallu ammaannartumi inissisimallutik. Siorna oktobarip ulluisa arfineq-aappaanni  sorsuttoqalinngitsoq inuit 260.000-t missaat tamaani najugaqarput.

/ritzau/AFP