Ukiuunerani OL-imut angalaneq naalakkersuisoqarfimmut 100.000 koruunit sinnerlugit akeqartoq

Timersornermut Naalakkersuisup Nivi Olsenip (D) atorfiliullu ataatsip Italiami Ukiuunerani OL-ertoqarneranut malinnaajartornerat 125.000 koruunit missaanni naleqarpoq.

Allattoq Paarnannguaq Nielsen

marsip 04-at 2026 15:49

Italiami februaarip arferngannit 22-ata tungaanut ukiuunerani OL-ertoqarpoq, tassungalu atatillugu Timersornermut Naalakkersuisoq Nivi Olsen (D) atorfilillu ataaseq malinnaajartorput.

Lars Poulsenip (S) paragraf 37 naapertorlugu apeqquteqarnermini Timersornermut Naalakkersuisup Italiami ukiuunerani OL-ertoqarnerani tamakkiisumik qanoq aningaasartuuteqartoqarnersoq apeqqutigaa.

Aningaasat tamakkiisumik katillugit 125.000 koruunit missaanni aningaasartuutigineqartut Nivi Olsen (D) akissummini allappoq.

Aningaasat taakku Timersornermut Naalakkersuisup atorfiliullu ataatsip angalanerminni aningaasartuutigisimagaat allaqqavoq.

Nunanik allanik attaveqaateqarneq nukittorsarneqartoq

Naalakkersuisoq nunatta suli tatisimaneqarnerani peqataasariaqavinnersoq, nunatsinnilu ataatsimoornissamik oqariartuuteqariarluni nunanut allanut angalaneq pingaarnersiuinerunersoq Lars Poulsenip aamma apeqqutigaa.

- Nunatsinni ataatsimoornissaq, ukiuuneranilu OL-eqarnerani nunarsuatsinni timersoqatigiinnerit annersaanni peqataanissaq Naalakkersuisup pingaarluinnartutut isigaa, Nivi Olsen (D) paragraf 37-mi taama akissuteqarpoq.

Italiamullu malinnaajartorneq aamma nunanik allanik attaveqaateqarnikkut nukittorsaasinnaasoq akissutigineqarpoq.

Nunattalu suli ilungersunartumi inissisimanerani nunanut allanut attaveqaateqartuarnissaq pingaaruteqartoq Nivi Olsen allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.