Islandip, Savalimmiut Nunattalu killeqanngitsumik niueqatigiinnissaat sulissutigineqartoq
Siunnersuisooqatigiillu Kalaallit Nunaata, Islandip Savalimmiullu akornanni killeqanngitsumik niueqatigiinnissaq annertuumik pilersaaruteqarfigaat.
- Siunnersuisooqatigiit suliassaqarfiit suliniuteqarfigalugit ingerlateqqitassaasa ilagaat immikkoortumi aningaasarsiornikkut suleqatigiinneq aammalu nunat avannarliit killiit killeqanngitsumik niueqatigiinnissaannik periarfissarsiuussinissaq.
Aamma atuaruk Inga Dora nunat avannarliit killiit inatsisartuisa suleqatigiiffianni pisortanngorpoq
- Nunat taakku pingasut killeqanngitsumik niueqatigiinnissamik isumaqatigiissuteqarnermikkut aningaasaqarniarnerminnik nukittorsaasinnaapput. Kalaallit Nunaat ataatsimoortumik tapiissutinik pisariaqartitsivoq, Savalimmiut ataatsimoortumik tapiissutinik pisartagaqarunnaarnissartik sulissutigaat Islandillu aningaasaqarniarnikkut ilungersunartorsiornerup nalaani nunap akiitsorilersimasaata annikillisarnissaannut iluaqutigisinnaassallugu.
- Tamatuma saniatigut Issittup imartaatigut aqqutit ammarneqarpata assartuinikkut attaveqaatit pitsaasut malitsigisaannik sunniivigeqatigiinneq pilersussaq Siunnersuisooqatigiit immikkut sammissamaarpaat, siulittaasoq Bill Justinussen, Nunat avannarliit killiit nittartagaanni taama allappoq.
- Silap pissusiata allanngoriartornerata tamatumalu Issittumi nunagisatsinnut sunniutigisassaat pissutigalugit, Issittoq pillugu nunat avannarliit killiit suleqatigiinnerisa annertusarneqarnissaa Siunnersuisooqatigiinnut pissusissamisoorpoq.
- Taamaammat nunat ataatsimoorussamik soqutigisaqarfiinut tunngatillugu nunat avannarliit killiit ataatsimoortumik tamarmillu iluaqutigisinnaasaannik periusissaannik Siunnersuisooqatigiit suliaqaleruttorput, Bill Justinussen oqarpoq.
Aamma atuaruk Nunat Avannarliit Killiit Siunnersuisoqatigiiffiani allattaaneq nutaaq
Bill Justinussen oqallittarfimmut peqataasimavoq, aamma makkunannga inuttaaffigineqartumi: Inatsisartut siulittaasorisimasaat Josef Motzfeldt, Einar K. Guðfinnsson, Islandimi inatsisartut, Altinget, siulittaasuat, Páll á Reynatúgvu aamma Savalimmiuni inatsisartut, Løgtingið, siulittaasuata tullia siunnersuisooqatigiinnilu Arctic Circle Assemblyp ataani allattaanerusimasoq Thordur Thorarinsson.
Nunat avannarliit killiit siunnersuisooqatigiit 1985-imi pilersinneqarput, maannakkutullu iluseqartillugit 1997-imiilli ingerlasimallutik. Siunnersuisooqatigiit nunanit pingasuusunit arfinilinnik ilaasortaaffigineqarpoq.