Islandimut aqqut apriilip naanissaata tungaanut matoqqasoq

Air Greenlandip Islandimut aqqutaa januaarip naanissaata tungaanut matuneqaqqaarpoq. Naalli januaari naangajaleraluartoq nunatta Islandillu akornanni toqqaannartumik angalaniartut qaammatialunni utaqqeqqittariaqarput.

Air Greenland KNR-imut allakatigut akissuteqarluni paasissutissiivoq.

- Niuernerpalaartumik pissuteqartumik tassuuna aqqutikkut angalanissamut soqutiginnittukinnera pissutigalugu marsimi apriilimilu angalanissat tamarmik taamaatippagut. Air Greenlandip pissutsit qanimut malinnaaffigai, oqartussanit kiisalu nioqquteqarfimmit pisariaqartinneqartut naapertorlugit naleqqussarnissatsinnut piareersimajuaannarpugut,

Taamaammat nunatsinnut Islandiliarniartut Københavnimut ingerlaqqaarlutik aatsaat Islandiliarsinnaapput.

Danmarkimit aqqut suli matoqqasoq

Maannali inuit amerlanerpaartaat nunanit allanit nuantsinnukarnissaat periarfissaanngilaq. Naalakkersuisummi aqqut taanna maannakkumuugallartoq februaari ilanngullugu matoqqatippaat.

Nunatsinniilli aallarnissaq suli periarfissaavoq, nunatsinnulli februaarimi uteqqinniartut qinnuteqaqqaassapput.

Aqqut unitsinneqaqqaarmat angalasut sumiiffimmit ataatsimeernissaat assigiimmillu misissortissimanissaat oqartussanit kissaatigineqarnera pissutaavoq.

AAMMA ATUARUK Nunatta Islandillu akornanni timmisartuussinerit tamarmik corona pissutigalugu ataasinngorpamit taamaatinneqassasut

Islandimi misissortinnissamut ajornartorsiuteqarpallaartanngitsoq taamani nalunaarutigineqarpoq, nunatsinnukartulli mittarfimmit ataasiinnarmeerunik nakkutiginiarnerat ajornaannerulissasoq oqaatigineqarluni. Angalasullu suminngaanneerfiat Kastrupiussasoq Namminersorlutik Oqartussat aalajangerpaat.

Malittarisassat maannakkutut inneranni nunatsinnukarnissamut coronamik tunillatsissimannginnermut uppernarsaammik annerpaamik ullunik pingasunik pisoqaassusilimmik tunniussaqartoqassaaq. Taanna siusinnerusukkut annerpaamik ullunik tallimanik pisoqaassuseqarnissaa piumasaqaataagaluarpoq, tamannali allanngortinneqarpoq.