Nunatta Islandillu akornanni timmisartuussinerit tamarmik corona pissutigalugu ataasinngorpamit taamaatinneqassasut
Islandimit nunatsinnut timmisartuussinerit tamarmik ataasinngorpamik matoqqatinneqassapput.
Namminersorlutik Oqartussat taama nalunaaruteqarput.
Taamaalilluni nunatsinnut taamaallaat Københavimit ataasinngorpamit angalasoqarsinnaalissaaq.
Timmisartuussinerilli ilaat ilaatinneqanngillat, assersuutigalugu ajornartoornermi mittariaqarnerit. Nuup Islandillu akornanni timmisartuussinerit qanoq sivisutigisumik matoqqatinneqassanersut ilisimaneqanngilaq.
Namminersorlutik Oqartussat silaannartap matuneqarnissaanut danskit oqartussaasuinut qinnuteqartuupput.
- Nunarsuarmi tamarmi – aamma Islandimi coronamik tunillatsittut amerliartuinnarneranut atatillugu sillimanissatsinnut tunngassuteqarpoq. Tamannali Islandimut immikkut tunngassuteqanngilaq, corona pillugu aqutsisoqarfimmi aqutsisoq, Nels Ulrik Winther oqarpoq.
Tamarmik assigiimmik misissorneqassasut
Islandip nunattalu akornanni Air Greenland Iceland Air-ilu aqqutigalugit timmisartortoqarsinnaavoq. Air Greenland nunat taakku marluk akornanni sapaatip-akunneranut ataasiarluni timmisartuussisarpoq.
Islandimit nunatsinnukartartut amerlavallaanngillat, angalasullu taakku Islandimi timmisartumut ikitinnatik coronamut misissorteqqaartarput. Tassa soorlu Københavnimi timmisartumut ikinnginnermi coronamik tunillatsissimannginnermut uppernarsaammik tunniussaqaqqaartoqartussaq.
Air Greenlandip sapaatip-akunneranut timmisartuussinermini qassit Dash-8-mut ilaasarnersut paasissutissiissutigerusunngilaa, timmisartuutileqatigiiffilli KNR-imut paasissutissiivoq:
- Nuuk Keflavikkillu akornanni angalaneq nunatsinni angalanerit allat asigalugit nunarsuarmi tamarmi tunillaassuuttoqarnerata annertusiartornerata ilutigisaanik ilaasartut ikiliartornerannik eqqugaangaatsiarsimavoq, pisortaagallartoq, Mogens Jensen oqarpoq.
AAMMA ATUARUK Coronamik tunillatsissimasoq Aasianniittoq peqqisseqqittoq – nunatsinni tunillatsissimasueruteqqittoq
Namminersorlutik Oqartussalli angalasut tamarmik sumiiffimmi ataatsimi katersuutsinniarpai, taamaaliornikkut angalasut tamarmik assigiimmik misissorneqartassallutik.
Taamaaliornikkullu nunatsinnut anglasut mittarfimmit ataasiinnarmit – tassalu taamaallaat Københavnimit aallartalerunik nakkutigineqarnerat pitsaanerulissasoq, Namminersorlutik Oqartussat naliliipput.
Nunatsinni tunillatsissimasoqanngitsoq
Air Greenland Københavnimi napparsimmavissuarmut isumaqatigiissuteqarpoq, tassa ilaasussat tamarmik misissorneqartassasut, misissorneqarnerisalu akissutaat Air Greenlandimut toqqaannartumik nassiunneqartarlutik. Nuummi misissuisarfik nutaaq aamma Air Greenlandimut atassuteqarpoq. Taamaalillutik nunatsinnut tikittut Nuummut tikikkunik misissuivimmut nutaamut misissortikkiartornissamut toqqaannartumik piffissalerneqartarlutik.
Islandimi coronamik tunillatsissimasutut nalunaarsorsimasut 5.039-upput. Tallimallu coronamik toqquteqarlutik.
Nunatsinni tunillatsissimasutut nalunaarsorneqarsimasut katillugit 17-iusimapput. Taakku tamarmik peqqisseqqinnikuupput, taakkunanngaallu napparsimmavimmut uninngasoqarnikuunani.
