Coronamik tunillatsissimasoq Aasianniittoq peqqisseqqittoq – nunatsinni tunillatsissimasueruteqqittoq

Nunatsinni coronamik tunillatsissimasutut uppernarsarneqarsimasueruteqqippoq.
Nakorsaanerup Henrik L. Hansenip Aasianni najugaqartut nalliuttorsiornerit kaffillernerillu pillugit mianersussassut sapaatit-akunnerisa marluk matuma siorna piumaffigai. Assi © : KNR
Allattoq Christine Hyldal
novembarip 05-at 2020 12:49

Nunatsinni coronamik tunillatsissimasut nalunaarsorsimasut 0-imiileqqipput.

Tunillatsissimasoq Aasianniittoq peqqisseqqittutut nalunaarutigineqartoq, naalakkersuisut nalunaaruteqarput. 

Angerlarsimaannarneq misissorteqqinnerlu

Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat. 

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

Aasianni immikkullu ittumik innersuussutit aaqqissuussinernut, nalliuttorsiornernut kaffillernernullu sapaatini akunnerni kingullerni marlunni atuussimasut maanna atorunnaarput.

Nakorsaanerup Henrik L. Hansenip Aasianni najugaqartut nalliuttorsiornerit kaffillernerillu pillugit mianersussassut sapaatit-akunnerisa marluk matuma siorna piumaffigai. Tamanna Aasianni inuit 15-it tunillatsissimasumut qanillisimanerisa kingunerisaanik mattusimasariaqarneranik pissuteqarpoq.

AAMMA ATUARUK Aasiannut sukannersumik suli ukkatarinninneq: 15-it tunillatsissimasinnaasut

Tunillatsissimasutut uppernarsarneqartup angerlarsimaannarnissamut malittarisassanik malinninnginnerata kingunerisaanik amerlasuut qanillivallaarsimapput.

Nakorsaanerup oqarnera naapertorlugu tunillatsissimasoq nunatsinnut tikinnermi kingornatigut quersorlunilu toqqusaarlulaarsimavoq. Taamaakkaluartorlu ullluni tallimani angerlarsimaannarnermini pulaartoqarpoq. Taamaalioqqusaanngilarli.

Sisimiuni sanaartornermik ilinniarfimmi atuartut 80-it ulloq ataaseq angerlartiinnarneqarput, borgmesterilu Ane Hansen sillimaniarneq pillugu aamma angerlarsimaannartinneqarluni, taassuma angerlarsimaannarnissaanut tunillatsissimasumut qanillisimasumik suleqateqarnera pissutaavoq.

Nunatsinni inuit 17-it coronamik tunillatsissimasutut nalunaarsorneqarnikuupput. Taakku tamarmik peqqisseqqinnikuupput, taakkunanngalu napparsimmavimmut uninngasoqarnikuunani.