Islandimi aalisartitsiqatigiiffissuup eqqumiitsuliortunngorniaq eqqartuussivimmut tunniuppaa
Islandimi aalisartitsiqatigiiffiit annersaata Samherjip islandimiu eqqumiitsuliortunngorniaq Oddur Eysteinn Friðriksson - Odeetut ilisimaneqartoq Londonimi eqqartussiviit qullersaanni eqqartuussivimmut tunniuppaa.
Taama tuluit nutaarsiassaqartitsiviat The Guardian allappoq.
Eqqumiitsuliornermi suliniummini Odee siorna nittartakkamik saqqummiivoq, tassanilu aalisartitsileqatigiiffik Samherji salluliuummik nalunaaruteqartillugu, salluliuummi aalisartitseqatigiiffik akiliilluni peqquserluttuliornerminut, ileqqorlunnerminut nunasiaateqarniartutullu pissusilersornerminut utoqqatsertuusaarnerarneqarpoq.
Nittartakkami salluliuummi ilaatigut allaqqavoq -Sameherji utoqqatsertoq, taarsiinissaminut neriorsuuteqartoq oqartussanillu suleqateqarnernissaminik neriorsuisoq.
2019-imi ileqqorluttuliornermut atatillugu suliamut attuumassuteqarpoq salluliuummik utoqqatserneq.
Namibiami iluanaarutaalluarsinnaasunik aalisarnermut pisinnaatitaaffeqarnissamut qulakkeerinninniarluni atorfilinnik namibiamiunik akiliilluni peqquserluttuliorsimasutut Samehejri pasisaalluni Islandimi tusagassiorfinnit WikiLeaksimilu uppernarsaatinik saqqummiunneqarpoq.
Nittartakkap saniatigut Odee nunani 20-ni tusagassiorfinnut 100-nut nalunaaruteqarpoq aalisartitseqatigiiffissuup pisuutinneqarnini akuerigaa.
Eqqumiitsuliortutut soraarummeernerminut atatillugu saqqummersitsinermini Reykjavikkimi eqqumiitsuliornermut saqqummersitsivimmi allataq taamaattoq iikkami qalipagaq 10 meteritut takissuseqartoq saqqummersippaa .
Samhejri qisuariapallappoq nittartagarlu peersillugu. Suliffeqarfiup tuniniakkaminik ilisarnaataanik innarliisutut eqqunngitsunillu paasissutissiisutut Odee eqqartuussivimmut tunniuppaa. Suliffeqarfimmillu isumaqatigiissuteqarnissamut Odee itigartitsivoq.
-Samhejrimik isumaqatigiissuteqanngissaannassaanga. Killiligaanani oqarsinnaaneq ajugaassasoq upperaara islandimiu eqqumiitsuliortunngorniartoq oqarpoq.
