Isikkamik arsaanneq: Nuna tamakkerlugu sungiusaasoq siornatigut nunanut allanut unammisartumik ikiortitaarpoq
Isikkamik arsaannermi nunanut allanut unammisartut aqutsisui inississulerput. Nuna tamakkerlugu sungiusaasoq Morten Rutkjær aasaq atorfinippoq. Maanna taassuma ikiortissani toqqarpaa siornatigullu superligami unammisartoq kalaallit arsariaasiannik unammisassaannillu nalilersueqqissaartassaaq.
Morten Rutkjær KNR-mut ilisimatitsivoq kalaallit unammisartut toqqarallakkani siulliit sapaatit akunnerisa marluk ingerlaneranni saqqummiutissallugit. Ikiortissanili toqqareerpaa.
- Assorsuaq tulluusimaarutigaara nunanut allanut unammisartunik sullisseqataasussanut Nukannguaq Zeeb peqataajumammat, Morten Rutkjær oqarpoq.
- Nunamini ilisimasaqarluarnermigut kalaallit arsaattarneranni siuarsaaqataassaaq aammalu kalaallit arsaattarnerat arsartullu ilisimalluaramigit isummersueqataalluartassalluni. Uannut assut pingaaruteqarpoq ikiortima kalaaliunissaa pikkorissuunissaallu. Tassaavorlu Zeeb!, Morten Rutkjær oqarpoq.
Nukannguaq Zeeb siornatigut Nunatsinni pissartaaqataasarpoq Qeqertarsuarmiut G-44 peqatigalugit taakkunanilu assersuisuni qitiulluinnarluni. Aamma futsalimi silamilu arsaannermi nunanut allanut unammisartuniittarpoq.
Maanna Savalimmiuni najugaqarpoq sulilu arsaattarluni.
- Ukiorpassuit immitsinnut ilisarisimavugut uannullu pissusissamisuuinnarpoq taassuma ikiortigilernissaa. Suliaminut pikkorissuuvoq maannalu Savalimmiuni misilittagartusarpoq sungiusaasutullu ingerlaqqinnissamik eqqarsaateqarluni. Neriuppunga sungiusaasutut misilittakkannik tuniorarsinnaassallugu, Morten Rutkjær oqarpoq.
Siornatigut superligamiittoq
Sineriak isorartummat piukkunnaatilinnik alaatsinaattussanik toqqaasoqassaaq. Aammalu arsaannermi ilisimaneqarluartoq alla nunanut allanut unammisartunik sullisseqataasussanngorpoq.
Tassa siornatigut Superligami unammisartoq Morten Hamm, aamma pikkorinnerni sungiusaasutut UEFA A-mik taaneqartartumik ilinniagaqartoq. Taanna kalaallit unammisassaannik arsaattuinillu nalilersueqqissaartassaaq.
- Taassuma suliassaa uannut assut pingaaruteaarpoq video atorlugu arsartut nalilersoqqissaarsinnaaniassagatsigit. Arsaattut nunanullu allanut unammisartut pikkorinnerulersinnissaannut tamanna sakkussatsialaavoq, Morten Rutkjær oqarpoq.
- Nunanut allanut unammisartut patajaatsumik toqqaveqarnissaat kalaallit arsaattarnerisa inerisarnerannut pingaaruteqarluinnarpoq – tassanilu suleqataasut pikkorissut pisariaqarput klubbini sungiusaasunik attaveqarnermut pingaaruteqarluinnaramik, Morten Rutkjær naggasiivoq.
