Lauritzenip utoqqatsissutaa Aleqa Hammondip ingerlateqqikkaa
Venstre sinnerlugu akileraartarnermut ministeri Karsten Lauritzen isssuarlugu Dagbladet Holstebro Struer marlunngornermi unnukkut ima allaaserisaqarpoq:
- Kalaallimilli "pisiaqarnitsigut" tapersersuisut 91-issaat qulakkeerparput. Kalaallit Nunaannit ilaasortat aappaat Folketingip Kalaallit Nunaannut tunngasunut ataatsimiititaliaani siulittaasunngortipparput, taamaaliornikkut suliani pingaarutilinni naalakkersuisunut akerliusumik taasisannginnissaa qulakkeerlutigu.
AAMMA ATUARUK Ministerip 'kalaallimik pisinerarnini' ajuusaarutigaa
Lauritzenip taama oqarnera partiip Venstrep Lemvigimi ukiortaarsiortinneqarnerani pivoq. Taamak oqarnera aalassatsitseqaaq isornartorsiorneqaqalunilu. Ministererlu tusagassiuutitigut Aleqa Hammondimullu allagaqarnikkut ajuusaarnini oqariartuutigaa. Ministerillu allagaqarsimanera Aleqa Hammondip Facebookimini ingerlateqqippaa.
Ministerip oqalugiarnermini tusagassiortoqarsimasoq ilisimasimanagu allakkamini ilaatigut oqaatigaa.
- Asasara Aleqa. Lemvig Dagbladimi issuarneqarnera pillugu, tassa naalakkersuisunik uppisitsinnginnissannik isumaqatigiissuteqarnerput, ajuusaarnera tusartinniarlugu sianeraluarama. Ataatsimiinnermi matoqqasumi oqaatigaara ilisimanagulu tusagassiortunik tusarnaartoqartoq. Ajuusaarnera utoqqatserneralu tusartikkusuppakka, sianerfigisinnaavarma. Inussiarnersumik Karsten Lauritzen, ministeri Hammondimut allassimavoq.
Aleqa Hammond Facebookimini allappoq pineqartoq isigaluni utoqqatserumaartoq. Aleqa Hammond KNR-imit oqaaseqartinniaraluarparput Facebookiminullu innersuussiinnarpoq.
Aleqa Hammond, Folketingemi attaviitsuusoq, decembarimi Kalaallit Nunaannut tunngasunut ataatsimiititaliami siulittaasunngortinneqarpoq. Tamanna naalakkersuisunik uppisitsinnginnissamik neriorsuuteqarneratigut pivoq.
Akileraartarnermut ministerip Aleqa Hammondimut allassimanini uppernarsarpaa.
AAMMA ATUARUK Kalaallimik pisivugut
