KNAPK timmisartup alapernaarsuutip atorsinnaannginnera pillugu: Isertitanik annaasaqarsinnaavugut
Illersornissaqarfiup timmisartua Challengereq arlaleriarluni atorneqarsinnaannginnera eqqarsarnartoqarpoq.
KNAPK-ip siulittaasua Nikkulaat Jeremiassen allakkatigut KNR-imut taama akissuteqarpoq.
- Naammagisimaarnanngilaq Kalaallit Nunaata imartaani avatangiisinik mingitsutsinerit imaluunniit unioqqutitsilluni aalisarnerit paasineqartassanngippata, KNAPK-ip siulittaasua taama oqarpoq.
Illersornissaqarfiup timmisartua Challenger Kalaallit Nunaata silaannartaanik alapernarsuisartussaavoq, annaassiniarnermi aalisarnermilu nakkutilliinermik suliaqartartussaalluni.
Ajoquteqallattaasoq
Timmisartoq 2021-mili Kalaallit Nunaanni alapernaarsuisartussanngortinneqaraluarpoq, piffissanili assigiinnigitsuni atorneqarsinnaasimanani.
DR. taama allaaserisaqarpoq,
DR-ip paasissutissiissutai naapertorlugit timmisartup challengerip alapernaarsuisarnissaanut neriorsuutigineqartut 2021-mit ukioq 2022-ip qiteqqunnerata tungaanut piffissap affaannaa atorneqarsimavoq. Siorna 2022-imi aggustip aallaaqaataanit ukiormanna juunip ulluisa 23-ata tungaanut tassalu ulluni 87-ni atorneqarsinnaasimanngilaq
Mingutitsisoqarnerani unioqqutitsillunilu aalisartoqarnerani isertitanik annaasaqarsinnaneq
. Isertitassat annertuut annaaratarsinnaavavut, mingutsitsineq imaluunniit unioqqutitsilluni aalisarneq peqqutigalugu isertitat appariassagaluarpata. Tamanna illersorneqarsinnaanngilaq. Upalungaarsimaneq sipaarniarfigissallugu akissaqanngilagut, Nikkulaat Jeremiassen taama oqarpoq.
Illersornissamut ministeriugallartoq, Troels Lund Poulsen (V) isumaqarpoq, pissutsit naammaginngitsut, timmisartup Challengerip nakkutilliinermut isumaqatigiissummik naammassinnissinnaasimanngimmat.
Taamaattumik danskit naalakkersuisui timmisartunik nutaanik pissarsisinnaanissaminnut misissussapput, illersorinissamut minsteriugallartoq DR-imut akissuteqarluni taama oqarpoq.
- Timmisartuutivut Challengerit nutaajunnaareerput. Taamaattumik nakkutilliinermik suliaqarsinnaajumalluta aamma timmisartunik nutaanik pissarsisinnaanissarput misissussavarput, tamannami naalagaaffeqatigiinnermut pingaaruteqaqimmat, Troels Lund Poulsen DR-imut taama oqarpoq.
