Tusagassiorfik: Illersornissaqarfiup timmisartua naammattumik nunatsinni nakkutilliisinnaanngilaq
Illersornissaqarfiup timmisartua Challenger-i Kalaallit Nunaata qulaanik nakkutilliisussaq piffissani arlalinni atuussinnaasimanngilaq.
Taama allappoq DR.
Illersornissamut isumaqatigiissummi nutaami ukioq manna siusinnerusukkut saqqummiunneqartumi Issittumik nakkutilliineq pingaartinneqaraluaqaaq. Kisianni timmisartoq 2021-mili inissinneqareeraluarpoq, pilersaarullu malillugu sivikitsuinnarmik piffissaqartitaalluni Kalaallit Nunaata silaannartaanik qulaavaanissaminut piareersimasassaaq imaluunniit annaassiniarnernut peqatasassalluni.
DR-ip paasisai naapertorlugit Illersornissaqarfiup timmisartua Challengeri 2021-mit 2022-p qeqqanut piffissap neriorsuutigineqrtup affaannaani atuussimavoq. Aggustip aallaqqaataani 2022-miit ukioq manna 23. juunimut timmisartoq ulluni 87-ini atuussinnaasimanngilaq.
Tamanna naammaginanngilaq
Tamatumunnga peqqutaavoq timmisartup annertunerusumik aserfallatsaalinissaa teknikkikkullu iluarsiiffigineqarnissaa piariaqarsimammat, illersornissamut ministeriugallartoq Troels Lund Poulsen Venstre-meersoq oqarpoq Folketingets Forsvarsudvalgimut (Folketingip Illersornissamut ataatsimiititaliaanut) akissummini.
Folketingimut ilaasortaq Aaja Chemnitz IA-meersoq naapertorlugu nakkutilliineq annertunerusumik salliutinneqarsimanngimmat kukkunerujussuuvoq. Aamma isumaqarpoq Danmarkip Kalaallillu Nunaata akornanni ataqatigiinnermut anguniakkat naammassineqanngimmata nungullarsaataasoq.
Aamma Troels Lund Poulsenip pissutsit naammaginngilai. DR-imut naammaginannginnerarpaa timmisartoq ukiuni marlunni malittuinarni nakkutilliinermut isumaqatigiissummik naammassinnissinnaasimanngimmat.
- Aamma timmisartuutivut Challengerit nutaajunnaareerput. Taamaattumik nakkutilliinermik suliaqarsinnaajumalluta aamma timmisartunik nutaanik pissarsisinnaanissarput misissussavarput, tamannami naalagaaffeqatigiinnermut pingaaruteqaqimmat. Taamaattumik isumaqatigiissutitsitut nakkutilliinermik isumaqatigiissutigisatsinnik eqqortitsisinnaannginnerput akerlilerneqarsinnaanngilaq, Troels Lund Poulsen DR-imut oqarpoq.