Issittoq illersornissaqarfiup pingaarnersiuinerani qullerpaavoq: Pilersaarulli amigaataavoq
Sakkutuut Issittumi umiarsuaanni inuttat amigaataapput, umiarsuit pisaqaapput Kalaallit Nunaannilu timmisartuaqqat inuttaqanngitsut pillugit isumaqatigiissut unittooqqavoq.
Kisianni piviusumik suli isumaqatigiissuteqartoqanngilaq.
Taamaammat danskit illersornissamut ministeriata, Troels Lund Poulsenip ajornartorsiutaasut pillugit naalakkersuisut, savalimmiuni lagtingi danskillu folketingiata oqaloqatiginissaat qilanaaraa.
- Illersornissaqarfiup ilusilersugaanerata sinaakkutaannut atatillugu isumaqatigiissuteqartoqarnissaa naatsorsuutigisinnaagipput aamma ilimagaara, kisianni aamma naalagaaffeqatigiinni nakkutilliinerup pitsanngorsarsinnaaneranut aningaasaliiniarnermik suliniuteqartoqarnissaa, taanna oqarpoq.
Nakkutilliisoqarnerulernissaa pisariaqartoq
Illersornissamut ministerip oqarnera naapertorlugu Issittumi umiarsuarni inuttassaaleqineq pinasuartuuvoq, taamaammallu erngertumik iliuuseqartoqarnissaa aamma pisariaqarsoraa.
- Umiarsuit ilaanni inuttassaaleqinermut atatillugu iliuuseqartariaqarpugut, umiarsuarnimi Issittumi angalasuni qajannaannerup qaffasinnissaa soorunami isumagissagatsigu, taanna oqarpoq, pissutsillu annerusumik oqaaseqarfiginagit.
Troels Lund Poulsen tamatuma saniatigut piffissami matumani timmisartuaqqat inuttaqanngitsut pillugit nutaamik oqaaseqarsinnaannginnerarpoq, issittumilu piginnaasaqalernissamut isumaqatigiissut 2021-meersoq naapertorlugu NATO-p kissaatai malillugit iliuuseqartoqassaguni taakku qanittumi pisiarineqartariaqaraluarput.
Akilli qaffasinnerunerat pissutigalugu illersornissamut ministereqarfiup timmisartuaqqat inuttaqanngitsunik nakkutilliinermik suliariumannikkumasorpassuit itigartitsissutigineqarput, Troels Lund Poulsenillu oqarnera naapertorlugu timmisartuaqqat inuttaqanngitsut atornissaasa isumaliutigineqaqqittariaqarneranik tamanna isumaqarsinnaavoq.
- Imaanngilaq (timmisartuaqqat inuttaqanngitsut aaqq.) atorneqassanngitsut, kisianni allatigut atorneqarsinnaavoq, tamannalu piffissami qaninnermi aaqqiissuteqarfigissavarput, taanna oqarpoq.
Nunatsinni illersornissamik ilinniarfik
Issittumi piginnaasaqalernissamut isumaqatigiissut 2021-meersoq naapertorlugu nunatsinni illersornissamik ilinniarfimmik pilersitsiniartoqartoq allassimavoq. Sulili ilinniarfeqalinngilaq.
Troels Lund Poulsen tassunga atatillugu Nuummiinnermini nunanut allanut tunngasunut, inuussutissarsiornermut niuernermullu naalakkersuisoq, Vivian Motzfeldt (S) ilinniarfimmut atatillugu ilinniarfissaq oqaluuseriniarlugu oqaatigaa.
- Isumaqatigiissutigineqarsimasut naammassineqassapput, piffissamillu tassunga pilersaarusiussaagut, taanna oqarpoq.
Illersornissaq pillugu isumaqatigiissummi illersornissamut ministereqarfimmit maajip naanerani saqqummersinneqartumi 143 milliardit koruunit 2033-p tungaanut atorniarneqarput.
Illersornissamullu ministerip Issittumi pingaarnersiukkat illersornissamut ministereqarfiup illersornissamut isumaqatigiissummi nutaami aningaasaliissutit siulliit aallartinneqarpata tassa ukiamut qaqinneqarumaartut naatsorsuutigaa.
