Danmark nunatsinnut tapiissutisigisartakkami 35-eriaataannik Illersornissaqarfimmut aningaasaliissuteqalersaartoq
Danmarkip naalakkersuisui Illersornissaqarfimmi sorsunnersuup kingulliup kingornali aatsaat taama nutarterilersaartigaaq.
Tassa 143 milliardit koruuninik Illersornissami ukiuni tulliuttuni qulini pitsanngorsaanermut aningaasaliissuteqalersaarput. Aningaasat taakkua Danmarkip nunatsinnut ukiumoortumik tapiissutigisartagaata 35-eriaataasa missigaat.
Danmarkip illersornissamut ministererigallagaa, Troels Lund Poulsen (V), Danmarkip naalakkersuisuisa Illersornissaq pillugu isumaqatigiissutissatut siunnersuutaat ullaaq manna saqqummiukkamiuk taama oqarpoq.
Tassa nunatta Savalimmiullu naalakkersuisui suleqatigalugit nunani taakkunani marlunni nakkutilliinerulersaartitsillutillu alapernaarsuinerulersaartitsisut, Danmarkip naalakkersuisuisa siunnersuutiminni allapput.
Tassa Illersornissaqarfik ataatsimut isigalugu tamarmi nutartigassaavoq. Ilaatigut atortunik illunillu nutarterinissaq, qarasaasiatigut pitsaanerusunik attaveqaateqalernissaq sulisoqarnerunissarlu tamatumani pineqarput.
Nunatta Savalimmiullu sakkutuunngorniarfeqalernissaat kissaataannut ilaanngitsoq
Kingullertut taasaq ingammik ajornartorsiutaaqaaq. Illersornissaqarfimmi sutigut tamatigut sulisussaalatsivoq.
Taamaammat Danmarkimi inuusuttut sakktuujusussaatitaasut amerlineqarnissaat taakkulu maannaminngarmit sivisunerusumik sakkutuujusussaatitaasalernissaat, Danmarkip naalakkersuisuisa siunnersuutigaat. Troels Lund Poulsenili sakkutuujusussaatitaasut qanoq amerlineqartigisariaqarnerannut sakkutuujusussaatitaanerallu qanoq sivitsorneqartigissaneranut tunngasunik oqaaseqarumanngilaq.
Kalaallit savalimmiormiullu ullumikkut sakkutuujusussaatitaanngillat. Tamannalu allanngussanersoq namminneq aalajangigassarigaat, Troels Lund Poulsen oqarpoq.
- Kalaallit savalimmiormiullu sakkutuujusussaatitaasaleqqunngilagut. Sakkutuujusussaatitaasalissanerlutik namminneq aalajangigassarivaat. Taakkulu tamarmik immikkut tamanna pillugu isummernikuupput. Kalaallit Nunaat nammineq iliuuseqalersaalereerpoq. Tamannalu isumaqatiginninniarnermi oqaloqatigiissutigissavarput.
Kalaallilli savalimmiormiullu sakktuujusussaatitaanissamut nammineq kajumissutsimik nalunaarsinnaapput.
Sakkutuujunngitsunik upalungaarsimasoqarnerulernissaq nakkutilliisoqarnerulernissarlu kissaatigigaat
Sakkutuujunngitsunik nunatsinni Savalimmiunilu upalungaarsimasoqarnerulernissaq, Danmarkip naalakkersuisuisa kissaatigaat. Illersornissaqarfiullu nunatsinni suliai sakkutuujunngitsunut iluaqutaanerulernissaat aamma kissaatigaat.
Tamanna qanorpiaq isumaqarnersoq, Danmarkip naalakkersuisuisa isumaqatigiissutissatut siunnersuumminni erseqqissanngilaat. Naalagaaffilli Issittumi Piginnaasanik Annertusaanermik taallugu 2021-mi isumaqatigiissusiornermut tunngatillugu ilaatigut nunatsinni pitsaanerusumik internetteqalernermik aamma kinguneqartussamik qaammataasatigut nakkutilliinermut kalaallillu nunaminnik illersueqataanerulersinnaanerannik kinguneqartussamik nunatsinni illersornissamik ilinniarfiliornissamut 1,5 milliardit koruuninik aningaasaliivoq. Nunatsinnili illersornissamik suli ilinniarfiliortoqanngilaq.
Naalakkersuisut Inatsisartullu nunatsinni Illersornissaq pillugu isumaqatigiissusiornissaq isumaqatiginninniutigileruttorpaat, taakkulu kissaataat isumaqatigiissutissap imarisassaanik aalajangiisooqataassapput. Kissaataallu erseriarpata illersornissamut ministeriugallartorlu isumaqatiginninniassapput.
Pilersaarutit malillugit juuliutinnagu isumaqatiginninniassapput.
Taamaalioreeriarpatalu aasaq manna feeriarfiup kingorna inaarutaasumik isumaqatigiissusiortussaassapput. Jakob Ellemann-Jensen sulinngikkallareerluni ministeritut taamanikkussamut sulileqqilersimassangatinneqarpoq.