Naalakkersuisup imigassartortarneq kamaammissutigigaa: Meeqqat unnulernissaanut annilaangasarput

Naalakkersuisup meeqqat annilaangallutik inuusut, inersimasut imigassamik ajornartorsiuteqartut, isumaginninnerlu ilungersuasoq: - Ikiorneqarnissaq utaqqiinnarnagu – nammineq akisussaaffimmik tigusisariaqartugut, taanna oqarpoq.

Allattoq Markus Valentin

juunip 05-at 2025 07:30

Nutserisoq Connie Fontain

- Tusagassiortunik katersortitsineq una takorloornikuugaluarpara aatsaat aggustimi pissasoq, kisianni kamaammernerup pianik aalajangernikuuvunga tusagassiortunik katersortitsiniarlunga.

Meeqqanut ilaqutariinnullu naalakkersuisoq, Maasi Pedersen (IA) pingasunngornermi ullaap tungaani tusagassiortunik katersortitsinermi oqarpoq.

Taanna isumaginninnermi susassaqarfik tamakkiisumik isigisinnaalerniarlugu nunatsinni kommunit tikeraarlugit angalaaleruttorpoq, piffissamili kingullermi pingaartumik imminut toqunnissamik siorasaarinerit imigassarlu pissutigalugit Maasi Pedersen innuttaasunut pissutsit ilungersunarluinnartut pissutigalugit erseqqissaassuteqarpoq.

TUSAANNGA

Tusaannga

Kiserliorpit aamma oqaloqateqarnissannik pisariaqartitsivit?

Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, unammilligassavillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit.

Telefon: 80 11 80

SMS: 1899

Tigusiffik: Tusaannga

- Qaammat naammat illoqarfiup qeqqatigut pisullunga, ullaap tungaa takusinnaagakkit inersimasorpassuit puusiaaserlutik aalakkutilereersimasut, aamma takusinnaavakka meeqqat annilaangasut, nalunnginnamikku unnugu angerlarsimaffimmi aalakkuttoqassasoq. 2024-mi meeqqanut naapertuilluanngitsuliornerit 69-iupput. Tamakku imigassartortoqarnerani angerlarsimaffimmilu eqqissiviilliortoqarnerani pisarput. Kisitsisillu amerlanerunissaat qularutiginngilara.

Naalakkersuisullu misigisisani apeqqusersuutigai:

- Qaqugu naammalissava. Qaqugu killissaq anguneqassava. Qaqugu nunatut ataatsimoorluta aalajangiissaagut?

Naalagaaffik tamanut aaqqiissutissaqanngitsoq

Maasi Pedersen tusagassiortunik katersortitsinermi angerlarsimaffiup avataanut inissiinerit aamma imminut toqussimasut amerlassusaat taaguleramigit attortisimasoq malunnarluinnarpoq.

- 300-t sinnillit meeqqat angerlarsimaffiup avataanut inissinneqarnikuupput, ulloq unnuarlu angerlarsimaffinniillutik. Tassa imaappoq ukiumut milliardit affaata tungaanut meeqqat angerlarsimaffiup avataanut inissinneqartarneranut aningaasartuutigisarpagut. Aningaasat inuiaqatigiinnut toqqaannartumik iluaqutaanerusutut atorusunnaraluassusii.

Imminut toquttut siorna ima amerlatigisut

Meeqqanut ilaqutariinnullu naalakkersuisup, Maasi Pedersenip (IA) tusagassiortunik katersortitsinermini imminut toqussimasut amerlassusaat saqqummiuppai.

Taassuma nunatsinni tamarmi 2024-mi imminut toqunnissamik siorasaaruteqartut 1200-ngajaat, imminut toqoriartut 90-it imminullu toquttut 50-it oqaatigai.

Tamatuma saniatigut 2023-mi 18-iliineqanngitsut sisamat imminut toqussimasut oqaatigaat.

Naalakkersuisut inuiaqatigiinni ajornartorsiutini immikkoortut pingasut oqaatigai: Angajoqqaat imigassartortut imaluunniit ikiaroortut, inisinneqartut amerliartortut meeqqallu inersimasunngortut innarlerneqarsimangaaramik imminut toquttut.

Tassanilu nassuerutiginnippoq: Naalakkersuisut imaluunniit kommunit kisimiillutik ajornartorsiutinut aaqqiissuteqarsinnaanngillat.

Akisussaaffimmik tigusineq

Taamaammat Maasi Pedersenip innuttaasut amerlanerusut ilungersuusseqataanissaat najukkaminnilu avatangiisinut pitsaasumik ineriartortitseqataanissaat kaammattuutigaa.

- Tamatta ikioqatigiilluta akisussaaffimmik tigusisariaqarpugut. Meeqqat, inersimasut utoqqaallu. Meeqqat ulorianartumiippata angajoqqaat utaqqinnassanngilagut – akisussaaffimmik tiguseqataasariaqarpugut.

Aamma atuarukAqissiaq Nuka Semsen imminut toqungajannikuuvoq. Allat inuuinnarnissaannik maanna ikiortarpai

Innuttaasut ikiuunnerunissaanni sunaana ujartorit?

- Assersuutigalugu Nanortalimmi klubbimi aqutsisoq akisussaaffimmik tigusivoq meeqqat inuusuttuaqqallu uummateqarfigingaarlugit peqqinnissaqarfik utaqqinagu nammineq akisussaaffimmik tigusivoq. Meeqqat inuusuttuaqqallu naleqartutut misiginissaannut aqqutissiueqataalluni sulivoq. Inuit taamaattut arlaqarput, kisianni inuit taamaattut aamma nukeertarput, nukeeraangata unittarput. Kivitseqataasaraluarput pisortat utaqqiinnarnagit. Taakku arlaatigut pitsaasumik sinaakkuteqarnissaat pillugu kommunit aamma oqaloqatigerusuppakka.

- Aamma Nanortalimmi politeeq nammineq kajumissutsiminik timersortarfimmi qallortarfiliorpoq meeqqat kajumiffigisaannik. Paasisakkalu malillugit Nanortalimmi pinerlunnermik appartitsivoq. Taanna politeeq allalerpoq, aallarunilu nangitsisussaqanngilaq. Tassa inuit taamaattut pisariaqartippagut. Atorfiit inuttaqanngitsut inuttalernissaat pisariaqartipparput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.