Uummannami utoqqaat nutaamik illutaarnissaat qanillivoq
Utoqqaat amerliartuinnarput. Uummannami aamma taama ippoq.
Utoqqaat nutaamik illutaarnissaat Avannaata Kommuniani kommunalbestyrelsip pingasunngornermi suliaraa. Siunnersuut utoqqaat illutaarnissamut tunngasoq akuerineqarpoq. Siumumeersoq, Sakio Fleischer, siunnersuuteqartuuvoq.
Siunnersuutinilu pillugu kommunalbestyrelsimut ima oqarpoq:
- Inissaqarniarnikkut pisariaqartitsineq annertusiartortoq takusinnaagakku taamaattumik Uummannami utoqqaat illuannik nutaamik sanaartortoqarnissaanik siunnersuuteqarpunga, Sakio Fleischer oqarpoq.
Utaqqisut arlaqartut
Suliap ataatsimiinnermi saqqummiunneqarnera naapertorlugu Avannaata Kommuniani utoqqaat illuini initaarnissamut utaqqisut 40-t missaanniittarput. Uummannami utaqqisut ukiup aallartinnerani aqqaneq-marluupput. Taakkua saniatigut nunaqarfinni Uummannap sulluaniittuni utoqqarnik aamma utaqqisoqartoq, Avannaata Kommunia allappoq.
Utoqqaat illutaarnissaatali aningaasalersorneqarnissaa tamakkiisumik suli qulakkeerneqanngilaq. Avannaata Kommuniani Teknikkimut Ataatsimiititaliap naliliinera naapertorlugu sanaartorneq 60 millionit koruuninik akeqassaaq. 30 millionit koruunillu, tassa aningaasartuutissatut missingiussat affaat, Namminersorlutik Oqartussanut akileqqullugit qinnuteqaatigineqassapput.
Taamaattumik utoqqaat illuata piviusunngorsinnaanissaa maanna suli qularnarallarpoq.
Sanaartugassaajumaarsinnaasup qanoq angitigissanera utoqqarnullu qassinut inissaqassanera ataatsimiinnermi ataatsimiissutissatullu allagaatini eqqaaneqanngilaq.
