Siumut illersornissaq pillugu siunnersuummik allagaateqanngilaq: Siunnersuuterput IA-p siunnersuutaanit ungasingaanngilaq
Danskit naalakkersuisuisa naalagaaffeqatigiinni tamani illersornissaq pillugu nutaamik isumaqatigiissutissaq marlunngorpat isumaqatiginninniutigilissavaat.
Uanilu Issittumi naalagaaffiullu avannarpasissortaani Illersornissaqarfiup suliassai pingaarnerpaatinneqassasut, illersornissamut ministeriugallartup, Troels Lund Poulsenip (V) nalunaarutiginikuuaa.
Tassunga tunngatillugu Nunanut allanut, inuussutissarsiornermut niuernermullu naalakkersuisup, Vivian Motzfeldip, partiit tamaasa siunnersuusiornissaannik uani sapaatit akunnerani qaaqqusaqattaarpai.
Naalakkersuisooqataasulli Siumut illersornissaq pillugu siunnersuutiminnik allatanngorlugu tunniussisimanatik, Siumup nunanut allanut sillimaniarnermullu ataatsimiititaliaani ilaasortaatitaa, Doris J. Jensen KNR-imut oqarpoq.
- Ataatsimeeqatiginikuuarput taavalu oqaatsitsigut taakkua anngunnikuuagut piumasaqaatigut. Kisianni taakku oqariartuutigut allanerungaanngillat Inuit Ataqatigiit anguniagaaniit.
Doris J. Jensenip Siumup anguniagaani - illersornissaq annaassiniartarnerlu pillugu Siumut nittartagaani allaaserisimasartik siornarnisaq, illersornissaq pillugu siunnersuusiamittut innersuuppaa.
Illersornissarli pillugu siunnersuusiaminni pingaarnersiukkamik ilaat KNR-imut ima oqaatigaa.
- Nunarput issittumi qitiusumik inissisimanermini pingaaruteqartumik inissisimammat, nunatta oqartussaaffii annertunerulissasut soorlu killeqarfimmi nakkutiginnittuuneq tamakkiisumik siunissami qaninnerpaami tiguneqassasoq, Doris J. Jensen oqarpoq, nangillunilu.
- Naalakkersuisut toqqaannartumik NATO-mi peqataatinneqalernissaat Siumuminngaanniit anguniarparput. Soorluttaaq aamma qarasaasiaqarnikkut sillimaniarnerup sakkortusaaffigineqarnissaa taanna pingaartillugutigu. Sillimaniarneq maannakkut pingaaruteqarluinnartumik inissisimavoq ingammi Ukrainemi Ruslandimilu sorsuttoqarnerup kingunerisaanik.
Taassuma ilanngullugu oqaatigaa Inuit Ataqatigiit illersornissaq pillugu siunnersuutaaniit Siumut siunnersuutaat allaanerungaanngitsut.
Isumaqatiginninniaqataaqqaarneq
Naalakkersuisulli isumaqatigiinniarnernut kissaatitik paasissutissiissutigerusunngikkallarpaat. IA-li maanna naalakkersuisoqatigiinnit marluusunit kisimiilluni kissaatiminik nalunaaruteqarpoq.
Naalagaaffeqatigiinni illersornissaq pillugu siunnersuuteqarnermi nunarput Savalimmiullu aatsaat ilaatinneqalernerat oqaluttuarisaanermut ilaasoq, Inuit Ataqatigiinneersup folketingimi ilaasortap, Aaja Chemnitzip, oqaatigaa.
Taamaammat isumaqatigiinniartoqalerpat nunatta namminerisamik siunnersuuteqarnissaa pingaartoq, taanna isumaqarpoq,
- Nunarput tamatumunnga politikkeqarnersoq ersarlunnikuuvoq. Illersornissaq pillugu isumaqatiginniartoqartillugu pappiliaq imaqanngingajattarnikuuvoq, Aaja Chemnitz KNR-imut oqarpoq.
Naalakkersuisut illersornissaq pillugu siunnersuutertik suli saqqummiukkusunngilaat.
Naalakkersuisut siunnersuutertik tunniukkaat
Naalakkersuisut illersornissaq pillugu siunnersuutitik tunniukkitsik, nunanut allanut, inuussutissarsiornermut niuernermullu naalakkersuisup, Vivian Motzfeldtip, tusagassiuutinut nalunaarummi allappoq, taannali erseqqissaassuteqarpoq:
- Partiit Folketingimi ilaasortaatitaqartut toqqaannartumik danskit naalakkersuisuisuinut oqaloqateqarnissamik periarfissaqarput, taamaaliornikkut partiitut pingaartitaminnik sulissuteqarsinnaallutik. Siumut Inuillu Ataqatigiit taamaaliorsinnaapput tamarmik Folketingimi ilaasortaatitaqaramik.
- Danmarkimi illersornissaq pillugu ministeriugallartorlu Troels Lund Poulsen ajunngilluinnartumik oqaloqatigiinnerit ingerlappavut. Erseqqissaassutigissavara qulequttami pingaarutilimmi peqqissaartumik sulinissaq pingaaruteqarmat, naammassilertornermiit pitsaasumik attanneqarsinnaasumillu suliaqarneq pingaarnerummat. Issittoq Nunarpullu pillugu illersornissaq pillugu Naalakkersuisut peqataatinnagit isumaqatigiittoqarnavianngilaq, Vivian Motzfeldt allappoq.
Illersornissaq pillugu siunnersuutit pillugit aasap kingorna isumaqatiginninniartoqarumaartoq ilanngullugu oqaatigineqarpoq.
