Isarukitsorsuit silap pissusiata allanngoriartornerata kingunerisaanik ikiliartupiloortut
Sikuiuitsoq Kujalliup kitaani silap pissusiata allanngoriartornerata kingunerisaanik sikuernerusalermat isarukitsorsuit kejserpingvinit piaraat ikiliartupiluulerput.
Tuluit misissuinerisa tamanna takutippaa.
Sikuiuitsoq Kujallermi sumiiffinni tallimat akornanni sisamani isarukitsorsuit piaraat ipillutik qiullutilluunniit nunguittut immikkut ilisimasallit oqaatigaat. Bellingshausenip imartaani sumiiffinni assigiinngitsuni misissuisoqarpoq.
Misissuinermi inernerit atuagassiaq Nature aqqutigalugu saqqummersinneqarput, saqqummersitsivik Communications: Earth & Environment aqqutigalugu saqqummersitsisoqarluni.
Isarukitsorsuit piaraat tukerlaat angutivissamit ivaneqarlutik kissassimaartinneqartarput, arnavissap aalissakkanik qaammatini marlunni nerisassarsiornerani.
Arnavissap pisani uteruni piaqqaminut nerliutigisarpai. Piaqqap qiviuerunnissaata tungaanut arnaata decembarip qiteqqunnerata missaanit sapaatit akunnialunni nerisitarisarpaa.
Bellingshausenilli imartaani novembarimi imarujaartalermat piaqqat ipillutik qiullutilluunniit peeruttalersimapput.
Isarukitsorsuit tamanna pillugu piaqqiffissanik nutaanik nassaassarsiortalersimapput, silalli pissusiata allanngorapiloornerata kingunerisaanik tamanna maanna ajornakusuulersimalluni.