Inuusuttut politikkimut sungiusartut

Suleqatitta Marie Kuitse Kristiansenip inuusuttut katerisimaarneranni najorpai:

Kommuneqarfik Sermersuumi inuusutut kommunalbestyrelsia aasaq qinigaasut imminnut ilisarilerniarlutik iffioqatigiipput, silami ikumaartitseqatigiinnissaminnut pikillutik.

Ikumaartitsinerminni ilaatigut inersimasunngorunik partiini sorlermiinnissartik eqqartorpaat. Taakkunannga peqataasut ilagaat:

- Julius Abelsen, Pele Jørgensen, suminngaaneerpisi? Kulusuk, Tasiilaq, maaniuna sususi? ataatsimiigiartugut, sumut? kommunalbestyrelsimut, inuusuttut Kommunalbestyrelsiani peqataasut Julius Abelsen 13-inik ukiulik aamma Pele Jørgensen aqqanilinnik ukiulik taama imminnut ilisaritipput.

Kommuneqarfik Sermersooq Inuusuttunik politikkimik suliaqarnissamik sungiusarusuttunik aasaq qineqqusaartitsivoq, qinigaasullu suliniutitik kommunalbestyrelsimut saqqummiukkiartorlugit maanna Nuummi ataatsimoorput. 

Julius Abelsenip, taakkununnga ilaasup, qineqqusaarutimi ilaat ima nassuiaatigaa:

- Timersorneq. Inersimasut meeqqallu timersortarmata, pingaartikkakku timersortarfittaarnissaat,

Inuusuttut Kommunalbestyrelsiannik pilersitsinissaq Kommuneqarfik Sermersuumi kommunalbestyrelsimi ilaasortap isumassarsiaraa. Taassuma siunertaq ima nassuiarpaa:

-  Siunertaq annerpaavoq atuartut akornanni isummersorsinnaaneq, ingammik inuiaqatigiilerinermi misilitsissutaasarami aamma. Taava taamaalillutik atuartut innuiaqatigiilerinermi peqataanerusinnaanerat aamma qaammarsarniarlugulusooq, taavalu siuarsarniarlugu taamatut isumassarsinikuuvunga, Peter Davidsen taama oqarpoq. 

Inuusuttut kommunimi politikkimut pulatsiarsimasut qineqqusaarutigisimasaminnik pingaarnersiuillutik saqqummiissaapput. Taakkulu kommunalbestyrelsimi eqqartorneqareerpata atuartut utertiffigineqarnissaat siunertaavoq.