Inuit marluk sapaatip akunnerata naanerani savimmik kapisinerit kingorna tigummigallarneqalersut
![](/sites/default/files/styles/image_934x467/public/2023-11/politi1_0.jpg?h=4ddd64a6&itok=HrwksETU)
- Sapaatip akunnerata naanerani imigassartortoqarsimaneranut atatillugu pisuni ulapippugut, savimmik kapisinerit pillugit marlunnik tigusarinnippugut, Kalaallit Nunaanni Politiit pigaartuisa pisortaat, Karl Sværd ataasinngornermi ullaap tungaani oqarpoq.
Maniitsumi ataaseq Nuummilu ataaseq. Angut Maniitsumeersoq toqutseriarsimasutut maanna pasineqartoq, politiit paasissutissiissutigaat.
Angutit tamarmik sapaammi sassartinneqarput, taakkulu politiit misissueqqissaarneri tunngavigalugit suliani susoqarnissaanik misissuinermi septembarip 19-iata tungaanut tigummigallarneqartussanngortinneqassasut aalajangerneqarpoq.
Nuummi pisumi suli susoqanngilaq, angulli siorasaaruteqarlunilu nakuusersimammat tigummigallagassanngortinneqartoq, pigaartut pisortaata oqaatigaa.
Misissueqqissaarneq nalinginnaasoq
- Angutit marluk tigummigallarneqarnerani nalinginnaasumik misissueqqissaartoqarnissaa maanna killiffiuvoq, Karl Sværd oqarpoq.
Angerlarsimaffimmi eqqissiviilliortitsisoqarneri, pagginnerit, aqqusinermi perulluliornerit imminullu toqunnissamik siorasaaruteqarnerit imigassartortoqarsimanerani pisorpassuarnut ilaasut, pigaartut pisortaata oqaatigaa.
Naalli ullumikkut ataasinngornerugaluartoq eqqissisimasoqarnerugaluartorlu politiit sapaatip akunnerata naanissaanut aggersumut akissarsiffiusussamut, akileraarutinik utertoorfiusussamut nipilersornermillu festivaleqarfiusussamut piareersalereerput.
- Taamaammat ulapinnissarput naatsorsuutigaarput, taamaammallu maannakkut piareersalereerpugut, Karl Sværd oqarpoq.