Unnuaq pillugu nalunaarut: Marloriarluni savilersortoqarpoq Kulusummilu nannumik aallaannittoqarluni

Ullaaq manna 05.26 Maniitsumi politiit angerlarsimaffimmi eqqissiviilliortoqarneranik nalunaarfigineqarput illoqarfiullu ilaani savilersortoqaratarsinnaaneranik aamma nalunaarfigineqarlutik.

Angut 20-it missaanik ukiulik qungatsimigut savimmik kilerneqarsimavoq. KNR-imut Kalaallit Nunaanni politiit pigaartuisa pisortaat Jørgen Madsen ilisimatitsivoq savilersorfigitissimasoq ikiminik passunneqarsimasoq.  

Pasisaasoq aamma 20-it missaanik ukioqartoq tigusaavoq savilersorsimasutut siorasaarisimasutullu unnerluutigisaalluni. Pasisaasoq ullumi Maniitsumi sassartinneqarumaarpoq. 

Ippassaq ualikkut Nuummi aamma savilersortoqarsimasoq nalunaarutigineqarpoq. Arfininngormat ualikkut 16.47 Aqqusinersuarmi savilersortoqarsimaneranik politiit nalunaarfigineqarput. Aqqusinersuaq Nuummi aqquserngit annersaasa ilagaat. Nalunaartoqarnerata kingorna politiit takkupput.  

Saassunneqartoq tassaavoq arnaq 30-ikkunni ukioqartoq. Tunumigut kapitissimavoq. Pisoqareernerata kingorna napparsimmavimmi passunneqartoq maannalu ajunngitsoq pisaartut pisortaat Jørgen Madsen oqarpoq. 

Pasisaasoq angut 40-it missaanik ukiulik tigusaavoq. 

- Taakku imminnut ilisisarisimasuusimapput, erngussimallutillu pisoqarmat pigaartut pisortaat oqarpoq.

Pasisaasoq ualeru sassartinneqarumaarpoq.

Kulusummi nanoq aallaaneqarpoq

Kalaallit Nunaanni poltitiit ullumi aamma nalunaarutigisinnaavaat ulluni kingullerni Kulusuup eqqaani nanoq angalaartoq aallaaneqarsimasoq.   

Nunaqarfimminngaanniit arlaleriarluni qimaateriareertarsimagaluarlugu maanna aallaaneqarpoq. 

-Sivitsortumik nanoq nunaqarfiup qanigisaaniissimavoq nunaqarfimmullu qaninngooriartuinnarmat ajoqusiinnginnerani toqussallugu aalajangiunneqarluni pigaartut pisortaat oqaluttuarpoq. 

Politiit kommunefogedi attaveqarfigaat taassumallu nanoq aallagaa Jørgen Madsen paasissutissiivoq.