Politiit ullormut nalunaarutaat: Illoqarfiit marluk nannumik qanillattorneqarput Nuummilu seqqorpallattoqarpoq
Naaqqiissutilerlugu politiinillu nutaarsiassartalimmik nal. 13.30 nutarterneqarpoq. Ilanngutassiami siusinnerusukkut nunatta kangiani nanoq Tasiilamiittoq allassimagaluarpoq. Tamannali eqqunngilaq. Nanoq Kulusuup qanittuani takuneqarpoq. Tamanna ilanngutassiami aaqqinneqarpoq.
Kalaallit Nunaanni Politiinit paasissutissat nutaat naapertorlugit nanoq tallimanngornermi ullaakkut uteqqippoq, qimaasinnissaali iluatsinneqarluni. Nanorli Kulusummut tallimanngornermi ualikkut nal. 13.30-p missaani uteqqippoq, maannalu najugaqarfiusumit 500-nit 600 meterinut ungasitsigisumiilluni. Politiit nanoq qunutillugu qimaatinniarsaraat.
Paamiut Kulusummilu nannumik ippassaq sisamanngornermi qanillattorfigineqarpoq.
Nannumik Paamiuni imarsiornermik ilinniarfiup eqqaaniittoqartoq, politiinut ippassaq ualikkut sisamat qaangeraa nalunaarutigineqarpoq.
- Nanoq qimaatinneqarsinnaasimanngimmat politiit piniartumik ikiorteqarlutik toquppaat, Kalaallit Nunaanni politiit pigaartuisa pisortaat Jeppe Andsager oqarpoq.
Nannumik toqutsisoqaraangat Piniarnermut Aalisarnermullu Naalakkersuisoqarfimmut nalunaarutigineqartussaasoq nannullu amia, kukii niaqualu toqqorneqartartut neqaalu pisarineqarfiani inunnut agguaanneqartartoq, politiit pigaartuisa pisortaat oqarpoq.
Nannumik tamatuma kingorna unnukkut arferngup qaangilaaraa qanillattortoqaqqippoq. Tamatumuuna Kulusummi, nanorlu qanillattortoq mittarfimmiit illoqarfiup tungaatunut 100 meterisut ungasitsigisumiittoq siumorneqarpoq.
- Nanorli taanna qimaatinneqarpoq, Jeppe Andsager oqarpoq.
Unnukkut marloriarluni seqqorpallattoqartoq
Nuummi seqqorpallattoqartoq, politiit pigaartuisa sisamanngornermi unnukkut aqqarnup missaani tusaavaat, minutsialuillu qaangiuttut nalunaarfigineqarput Nuup saavani umiatsiamit marloriarluni seqqorpallattoqarsimasoq.
Umiatsiamit seqqorpallattoqarnerani marloriarluni qaamaallattoqartoq nalunaarutiginnittup takusimavaa, umiatsiarli tamatuma kingorna suup tungaanukarnersoq arajutsisimallugu.
- Taamaammat umiatsiap qanoq ittuuneranik kikkullu iginnerannik nassuiaanneqanngilagut, taamaammat suliami tassani allatigut misissuivugut, Jeppe Andsager oqarpoq.
Kalaallit Nunaanni politiit suliami tassani suli misissuileruttorput, taamaammallu takunnissimasunit ilisimannittunilluunniit attavigeqqupput.
Taakkununnga ilaaguit 70 14 48-mut sianerfigalugit attavigisinnaavatit.