Inuit indianerillu meerartaat 4000-it Canadami kostskoliniitillutik toqusimapput

Canadami Ilumoortoq Saammaasseqatigiinnissarlu pillugit Ataatsimiititaliarsuup nunap inuiisa meerartaasa naalagaaffiup ilagiillu kostskoliniitillutik qanoq pineqartarsimanerannik misissuisup maanna uppernarsarpaa ikinnerpaamik meeqqat 4000-it kostskoliniitillutik toqusimasut.
Allattoq Marianne Stenbæk, Montreal, Canada, Simon Uldum
januaarip 14-at 2014 06:07

Allagaatit nutaat siornatigut pissarsiarineqarsinnaasimanngitsut maanna takutippaat.

Inuit indianerillu meerartaat nalinginnaasuunngitsumik toqquteqartarsimapput, ilaatigut ikuallattoqarnerani ajunaarlutik, perlerlutik kaatsitaallutik, nappaatinik tunillanneqarlutik imaluunniit timikkut annnersarneqarlutik kinguaassiutitigulluunniit atornerlugaallutik.

Kimberley Murrayp, Ataatsimiititaliarsuarmeersup, aviisi The Gazette naapertorlugu, oqarpoq nunap inuiisa meerartaat meeqqanit allanit naleqannginnerusutut isigineqarsimasut, taakkulu ilarpassuisa toqunissaat pinngitsoortinneqarsimasinnaasimagaluartoq. Assersuutigalugu kostkolit amerlasuut ikuallattoornermi tummeqqanik qimaaffissanik sanatitsinissaq aningaasartuuteqarfigiumasinanngilaat.

Meeqqat ilaat nerisakippallaarnertik pissutigalugu tuberkulosemik toqquteqarsimapput, allallu kostskolimi atukkatik artorsaatigalugu imminut toqussimallutik. Allallu toqumaasimapput.

Ajornerpaagunartorli tassaavoq, Kimberley Murrayip oqaatigisaatut, kostskolini taakkunani toqusimasut amerlanerungaatsiarsinnaanerat, tamannalu Ataatsimiititaliarsuup allagaatit tamakkerlugit misissoreerpagut paasineqarumaartoq. Amerlanerungaatsiarnissaallumi ilimagineqalereerpoq.

Meeqqat ilarpassui ataatsimoortillugit ilineqartarsimapput, allallu ilivii nalunaaqutseqartarsimanatik. Amerlanertigullu angajoqqaajusut ilisimatinneqartarsimanngillat. Canadami sumiiffinni arlalinni kostskolitoqqat eqqaanni iliveqarnersoq maanna misissorneqaleruttorpoq.

Pissutsit tamakku 1950-ikkut qiteqqunnerisa tungaanut atuussimapput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk