Inuit Ataqatigiit eqqissiallassinnaanngorput: Qinersinermut ataatsimiititaliamit akuerineqarput
KNR-ip paasitinneqarnera malillugu Kommuneqarfik Sermersuumi borgmesterip, Asii Chemnitz Narupip, qinersinermut ataatsimiititaliap siulittaasuanit Svend Hardenbergimit Inuit Ataqatigiit qinigassanngortitaasa allattorsimaffiisa ataatsimiititaliamit akuerineqarsimanerannik nalunaarfigineqarsimavoq, tamannalu aamma Aqqaluaq B. Egedep Facebookimi quppernermini uppernarsarpaa.
- Valgnævn-ip nalunaarfigaatigut piffissaq eqqorlugu nalunaarsimanerput uppernarsarsinnaallugu, taama allappoq.
Inuit Ataqatigiit qiningassanngortitaasa allattorsimaffiisa nal. 11.20 tigujumaneqannginnerat pissutigalugu nalorninartorsiortoqaleraluarpoq, taakku siulittaasup tullianit Juliane Henningsenimit atsiorneqaratik siulittaasumit Sara Olsvigimit atsiorneqarsimanissaat tigujumaneqannginnerinut tunngavilersuutigineqarluni.
Aamma atuaruk Kukkusumik siunnersorneqarneq pisuulluni IAp qinigassanngortitani kingusinaarluni tunniuppai
Olsvigilu Paamiuniimmat tamanna ajornartorsiutaalerpoq, allattorsimaffik Nuummi tunniunneqartussaammat. Siulittaasup atsiornerata nassiunneqarnera paamaarunneqarpoq, allattorsimaffiillu ullup qeqqata qaangereeraa, nal. 12.40, aatsaat tunniunneqarlutik.
Kommunilli qinersinermut siulersuisui aggersarneqapallapput kommunillu tungaanit kukkusoqarsimanera paasineqarpoq, qinigassanngortittullu allattorsimaffii piffissaq eqqorlugu tunniunneqarsimasutut nalunaarutigineqarlutik.
Aamma atuaruk IA: Qinigassanngortittut aqqisa allattorsimaffiat piffissaq eqqorlugu tunniunneqarput
Siulersuisulli inassuteqaataat qinersinermut ataatsimiititaliamit akuerineqaqqaartussaavoq, taakkulu ullumi aatsaat ataatsimiipput. Naalakkersuisoqarfimmi pisortap Svend Hardenbergip saniatigut Kanukokap pisortaa Hans Peder Barlach Christensen aamma biskoppi Sofie Petersen ataatsimiititaliamut ilaasortaapput.
