Danmark: Inuit arfinillit peqqarniisaarniarnissamut pilersaarusiorsimasutut pasineqarlutik tigummigallagaasut
Københavnimi politiit unnerluussisussaatitaasui inoqatinut attaveqaqatigiittarfikkut X-ikkut tallimanngornermi ullaakkut taama nalunaaruteqarput.
Arfinilit akornanni sisamat eqqartuussivimi najuunnatik tigummigallagassanngortinneqarput, inuillu arfinillillu tamarmik januaarip ulluisa qulingiluaata tungaanut tigummigallagassanngortinneqarlutik.
Eqqartuussivimmi najullutik killisiorneqartut pingasut akornanni marluk tigummigallagaapput.
Angut 50-it 90-illu akornanni ukiulik, arnarlu 19-inik ukioqarneragaasoq pasisanut ilaapput. Angut 29-nik ukiulik killisiorneqareerluni iperagaavoq. Angutilli iperagaatinneqannginnissaa pillugu politiit unnerluussisussaatitaasuisa suliaq ingerlateqqippaat.
Angutit marluk pasilliutinut qanoq inissisimanersut saqqummiunneqanngilaq, arnarli unnerluussutinut pinngitsuunerarluni.
Killisiorneqartut akornanni ukioqqortuneq inuiaqatigiinni oqallinnermut peqataakkajussimavoq. Taassumalli inuillu tigusarineqartut allat marluk kinaassusaat tamanut saqqummiunneqarnissaat inerteqqutaavoq, aqqimmi suliamut atatillugu isetuunneqartussanngortinneqarput.
Inuit sisamat allat peqqarniisaarniarnissamut pilersaarusiorsimasutut politiinit taassuma saniatigut pasineqarput, taakkuali politiit sisamanngornermi ullaakkut suligasuarneranni tigusarineqaratik.
Tigusarineqartut tamarmik peqqarniisaarniarnissamut pilersaarusiortutut
politiit isertortumik paasiniaasartuinit PET-mit pasineqarput. Sumi qanorlu peqqarniisaarniarnissamut pilersaarusiortoqarsimanersoq Danmarkimi oqartussat saqqummiukkumanngilaat.
