Politeerpassuit Danmarkimi tigusarinnittut: Peqqarniisaarniarnerugaluaq akornuserpaat
Danmarkimi sumiiffinni arlalinni politeerpassuit ullaaq tigusarinnipput. Peqqarniisaarniartoqarnissaanik pilersaaruteqartunik pasisaqarnertik tunngavigalugu taamaaliorput.
Taama statsministeri Mette Frederiksen (S), EU-mi qullersat ataatsimiinneranni Bruxelles-imi najuuttoq, ilisimatitsivoq.
Statsministeri DR-imit apersorneqarluni sioorasaarut ”aatsaat taama ilungersuanartigisimasoq” oqarpoq.
Danmarkimi politeeqarfiit aamma Politiit immikkut Paasiniaasartui suleqatigiillutik,”peqqarniisaarniat saassusinniissannik pasisaqarnertik tunngavilugu” Danmarkimi sumiiffinni arlalinni sisamanngornerup ullaavani paasiniaapput, taama Københavns Politi tusagassiuutinut nalunaaruteqarput.
Oqartussalli misissuiffitik sumerpiaq issimanersut aamma kikkut misissuiffigisimaneritik nalunaarutiginngilaat.
- Danmarkili peqqarniisaarfiginiarneqarnissamut ukiuni arlalinni aarlerinartorsioreerpoq. Mette Frederiksen DR-imut oqarpoq:
- Inuit nunanit allaneersut Danmarkimut pisimapput ajunngitsoq siunertarinagu. Ajoraluartumik. Tunngaviatigut paasisinnaanngilluinnarpara sooq inuit taama eqqarsartaaseqarnersut. Tunngaviatigut paasisinnaanngilluinnarpara nunannguarput taama nuannertigisoq aserorterniarlugu siunertaqartoqarsinnaammat. Kisianni tassa taamaappoq, inoqarpoq uatsinnik ajoquseerusuttunik.
Danmarkip nunanut allanut ministeria Lars Løkke Rasmussen (M) DR-imut aamma oqarpoq, peqqarniisaarniarnissamik sioorasaarineq Israelip Gazallu maannakkorpiaq sorsunnerannut attuumassuteqartoq.
Pisut pillugit Danmarkip nalunaaqutaa malillugu nalunaaqutaq ataatsimut tusagassiortunik katersuutsitsisoqassaaq, nunatta Kitaani nalunaaqutaq malillugu qulinut. Københavnip politeeqarfiani tusagassiortunik katersuutsitsisoqassaaq.