Internetteerukkallarneq Nanoq Mediap pakatsissutigaa
Immap naqqatigut kabeli, NanoqNetip Nuummi innuttaasunut internettimik neqerooruteqarnerminut atortagaa, TELE-POST-ip matugallarniarpaa, tamannalu NanoqMediamit pakatsissutigineqartoq, Nanoq Mediamit KNR-imut oqaatigineqarpoq.
Immap naqqatigut kabelip pilersaarutit malillugit suliarineqarnerani tamanna pissasoq TELE-POST ilisimatitsivoq.
Internetteerukkallarnerup kinguneranik atuisunik annaasaqarnissaq Nanoq Mediami pisortap, Bjørn Holmip, tupaallaatiginavianngilaa.
- Ulluni arfinilinni attaveerukkallarneq atuisutsinnut ajortorujussuussaaq. Neqeroorutitsinnillu atuisunik annaasaqassagutta tupaallaatiginavianngilara, Bjørn Holm KNR-imut oqarpoq.
AAMMA ATUARUK Tele-Postip emaili atorunnaarsikkaa
AAMMA ATUARUK TELE-POST 122 millionit koruuninik sinneqartooruteqartoq
TELE-POST-imik atuisut Nuummeersut, Kapisilinneersut Qeqertarsuatsiaaneersullu ataasinngornerup unnuaani akunnerup missaanik sivisussuseqartumik attaveerukkallarput. NanoqNetimilli atuisut ulluni arlalinni attaveeruttussaallutik.
- TELE-POST-ip atuisui unnuap ingerlanerani attaveerukkallarput, uagullu atuisugut ulluni arfinilinni attaveqassanngillat, Bjørn Holm oqarpoq, nangillunilu;
- TELE-POST-imut unammillerpugut, taamaammat taama sivisutigisumik attaveerutsitsisinnaanera pissusissamisuunngilaq.
TELE-POST-ili naapertorlugu NanoqNeti taama sivisutigisumik attaveerunnissaq pinngitsoorsimasinnaagaluarpaa.
- Nanoq Mediap internettimik nioqquteqarnermini aaqqiissutissaq teknikkikkut peqquteqartumik Nunatsinni internettimut attavilerneqarsinnaanngitsoq toqqarsimavaa. Taarsiullugu Danmarkikkoortumik internettimut attavilertarpoq, TELE-POST-imi wholesalemi pisortaq, Flemming Drechsel KNR-imut taama oqarpoq.
AAMMA ATUARUK TELE-POST beklager problemerne med internettet
Nunatsinni internettimik nioqquteqartut allat internettimut attavilerneqartarnerat TELE-POST-ip Nunatsinni assigiissaakkamik attavilerneqartarfiatigut pisarpoq, taannalu Islandimut immap naqqatigut kabelikkut Canadamullu immap naqqatigut kabelikkut internettimut attaviliisarpoq.
- Attavileeriaaseq taanna TELE-POST-ip innersuussutigiuaannarpaa, immap naqqatigut kabelip pilersaarutaasumik tassanngaannartumilluunniit pisumik atassutaarunnerani kiffartuussinernik atassutaaruttoqarnissaa pinngitsoortikkumallugu, Flemming Drechsel taama oqarpoq.
TELE-POST-ip KNR-imut ilisimatissutigaa immap naqqatigut kabelimik piffissami aggersumi allanngortiterisoqarniartoq, tamannalu pissutigalugu Islandimut attaveqaatip qamikkallarnissaa pisariaqassasoq, attaveqaatillu tamarmik Canadamut immap naqqatigut kabelikkut ingerlatinneqassasut. TELE-POST naapertorlugu allanngortiterinerit internettimik nioqquteqartunut allanut, soorlu Combyimut, Inu:it-mut TELE-POST-imullu annerusumik sunniuteqassanngillat.
AAMMA ATUARUK KNR-ip pisortaata TELE-p teknikkikkut ajornartorsiuteqarnera ernumagigaa
NanoqMediami pisortap Bjørn Holmip oqaatigaa TELE-POST-ip internettimik matusigallarnissani ullunik sisamaannarnik sioqqullugu nalunaarutigisimagaa, taamaammallu septembarip 14-ianit 20-ata tungaanut internettip attaveerunnissaa pinngitsoorniarlugu aaqqiissutissamik nassaarniarneq ajornarsimanerarlugu.
Taamaattoqarnera NanoqMediamit Nalunaarasuartaateqarnermik Aqutsisunut ilisimatitsissutigineqarsimasoq Holmip oqaatigaa.
NanoqMedia eqqarsaatigalugu TELE-POST-ip teknikerii aaqqiissutissamik ajartuisimagaluartut iluatsissinnaasimanngitsorli TELE-POST-imit oqaatigineqarpoq.
- Imaatigut kabelit suliarineqarnissaannut pilersaarutinik NanoqMedia ilisimatinneqartarpoq, suliaqarnissamulli anorip silallu qanoq inneri apeqqutaammata attaveerukkallarnerit qaqugu qanorlu sivisutiginissaat ulluleqqissaarsinnaanngilagut, Flemming Drechsel oqarpoq.
NanoqNetimik atuisut qaammammi matumani internetteerutissapput, aammali qaammatip tulliani taama pisoqaqqissasoq NanoqMediamit ilisimatitsipput.
Tassa oktobarip 12-ianit 20-ata tungaanut attaveerukkallartoqaqqissasoq Bjørn Holmip oqaatigaa.
NanoqNetimik atuisut attaveerukkallarnerup kinguneranik gigabytesinik ajunngitsorsiassarsiumaartut, taamatullu attaveqannginneq akilissanngikkaat Bjørn Holmip oqaatigaa.
